“Dok-1 Maks” ishida aybdor deb topilib, 18 yil muddatga ozodlikdan mahrum qilingan Sardor Kariyevga tayinlangan jazo yengillashtirilsa, uning onasi jabrlanuvchilarga to‘lanishi lozim bo‘lgan salkam 76 milliard so‘mlik tovon pulini o‘zi to‘lab berishini aytgandi. Munira Kariyevaning ushbu chiqishini ko‘rgan jabrlanuvchilar sudning navbatdagi majlisida ko‘rinish berib, tovon puli to‘lansa, Kariyevga nisbatan hech qanday da’vosi yo‘qligini aytdi. Bu haqda sudda qatnashgan “Daryo” jurnalisti xabar berdi.
Kariyevning onasi mard bo‘lib, shu pulni to‘lab beraman, dedi. Mayli, Kariyevning ham bolalari bordir. Tovon pulini to‘lab berishsa, Kariyevga nisbatan da’voyimiz yo‘q. Sudni shu yerda to‘xtating, bo‘lar ish bo‘libdi, onasi maydonga chiqdi-ku, to‘lab beraman, deb. Mana, 500 million so‘m o‘tkazibdi ham, shuni jabrlanuvchilarga bo‘lib beringlar, lekin davlatda qolib ketmasin, — dedi sudda chiqish qilgan jabrlanuvchilardan biri.
Jabrlanuvchining bu gapiga javob qilgan sudya bu pullar sudning depozit hisob raqamiga o‘tkazilganini, davlatning bunga hech qanday aloqasi yo‘qligini aytdi.
Kariyevning onasi yordam beraman deb turgan ekan. Biz shunga rozimiz. Tezroq pul berishsa, bolamizni davolatsak, ular ham boshqa bolalardek o‘ynab-kulib yurishlarini istaymiz. Mayli, Kariyevning aybi bordir yoki yo‘qdir — bilmayman, Alloh biladi. Uning jazosini yengillashtiring, mayli, olib tashlasangiz olib tashlang, ozodlikka chiqsin. Bolalari bordir. Onasi yordam beraman deb turibdi ekan, biz shunga rozimiz, — dedi navbatdagi jabrlanuvchi.
Yana bir jabrlanuvchi sudlanuvchilar qamoqda o‘tirgan bo‘lsa ham, ularni ko‘rishni istagan onasi sudga kelsa, uni ko‘ra olishini, ammo shu sirop sabab vafot etganlarning ota-onasi dunyolarni bersa-da, bolalarini ko‘rolmasligini aytdi.
Farzandim hozirgi kunda na ko‘radi va na eshitadi. Uni davolatish uchun menga katta mablag‘ kerak. Unisidan, bunisidan qarz olib, shu kungacha qildim. Muammoni tezroq biz tomonga hal qilib, pulni olib bersalaringiz, men ham, boshqalar ham farzandimizni davolatar edik, — dedi u.
Jabrlanuvchilarning boshqasi advokatlarning gapidan ranjishganini, ular farzandining o‘limi uchun yoki betob bo‘lib qolgani uchun sudlanuvchilardan pul undirish fikridan yiroqligini, faqat farzandining davolanishi uchun shu pullarni o‘z vaqtida olishlari kerakligini ta’kidladi.
Bu yerda bir milliard so‘mga qarab o‘tirganlar yo‘q. Menga bolamni sog‘aytirib berishsin, oldingi holatiga qaytarishsin, bir so‘m puli kerak emas. Bolamning avvalgi holatini qaytarib berishsa, 100 million emas, 300 million so‘m beraman. Faqat bolam sog‘aysa bo‘ldi. Farzandim hozir umuman og‘riqni his qilmaydi. Ukol qilinsa ham, kulib turadi. Sababi unda his qilish yo‘q. Uning ahvoli juda og‘ir. Tezroq davolatishim kerak, — dedi jabrlanuvchi ota.
Jabrlanuvchi onalardan biri Mushtariy Abdurahmonova ko‘pchilik sud qaroriga ko‘ra, ularga 1 milliard so‘mdan to‘lab berilgan, degan gaplar yurganini, ammo ular shu kungacha umuman pul olishmaganini aytdi.
Mayli, hech kimga qarshiligimiz yo‘q. Garov pulini to‘lab, chiqishsin. Kelishilgan holatda. Rozimiz, — dedi u.
Yana bir jabrlanuvchi esa vafot etgan nabirasining davolanishi uchun 1 milliard so‘m sarflaganini, Kariyevning onasi shu pulni to‘lab bersa ham, qilingan xarajatni to‘lab bergan bo‘lishini aytdi.
Shu pulni bersa ham, o‘zimizning bolamizni davolatish uchun ketgan xarajatni berishgan bo‘ladi. Kariyevning onasiga qo‘shilganimizning sababi — hech bo‘lmasa, zararimizni qoplash niyatimiz borligidir. Haligacha qarzim bor. Uzolmayman buncha qarzni. Kariyevning onasi mard bo‘lib, shu gapni aytdi. Bu gapni bizga hech kim aytmagan. Bizga zararni undirib bersangiz, nafaqat Kariyev, boshqalarni ham qo‘yib yuborishingizga qarshimasman. Bizga ularning qamalishidan foyda yo‘q, — dedi jabrlanuvchi.
Jabrlanuvchilarni tinglagan sudya Kariyevning advokatlariga murojaat qilar ekan, tovon puli to‘lanishi borasida hech kimga hech qanday topshiriq berishga vakolatli emasligini, faqat jabrlanuvchilar tovon puli to‘lansagina, Kariyevga da’vosi yo‘qligini aytayotganini, jabrlanuvchilarning da’vosi yo‘qligi ko‘p narsani hal qilishini ta’kidladi.
Farmagentlik sobiq rahbarining onasi Munira Kariyeva sudning 14-iyun kuni davom etgan majlisida qatnashib, tovon pullarini aytilgan muddatda to‘lashga tayyorligini, faqat o‘g‘liga nisbatan qo‘llangan jazo uy qamog‘iga o‘zgarishidan umidvorligini aytgandi.
Izoh (0)