“Док-1 Макс” ишида айбдор деб топилиб, 18 йил муддатга озодликдан маҳрум қилинган Сардор Кариевга тайинланган жазо енгиллаштирилса, унинг онаси жабрланувчиларга тўланиши лозим бўлган салкам 76 миллиард сўмлик товон пулини ўзи тўлаб беришини айтганди. Мунира Кариеванинг ушбу чиқишини кўрган жабрланувчилар суднинг навбатдаги мажлисида кўриниш бериб, товон пули тўланса, Кариевга нисбатан ҳеч қандай даъвоси йўқлигини айтди. Бу ҳақда судда қатнашган “Дарё” журналисти хабар берди.
Кариевнинг онаси мард бўлиб, шу пулни тўлаб бераман, деди. Майли, Кариевнинг ҳам болалари бордир. Товон пулини тўлаб беришса, Кариевга нисбатан даъвойимиз йўқ. Судни шу ерда тўхтатинг, бўлар иш бўлибди, онаси майдонга чиқди-ку, тўлаб бераман, деб. Мана, 500 миллион сўм ўтказибди ҳам, шуни жабрланувчиларга бўлиб беринглар, лекин давлатда қолиб кетмасин, — деди судда чиқиш қилган жабрланувчилардан бири.
Жабрланувчининг бу гапига жавоб қилган судья бу пуллар суднинг депозит ҳисоб рақамига ўтказилганини, давлатнинг бунга ҳеч қандай алоқаси йўқлигини айтди.
Кариевнинг онаси ёрдам бераман деб турган экан. Биз шунга розимиз. Тезроқ пул беришса, боламизни даволатсак, улар ҳам бошқа болалардек ўйнаб-кулиб юришларини истаймиз. Майли, Кариевнинг айби бордир ёки йўқдир — билмайман, Аллоҳ билади. Унинг жазосини енгиллаштиринг, майли, олиб ташласангиз олиб ташланг, озодликка чиқсин. Болалари бордир. Онаси ёрдам бераман деб турибди экан, биз шунга розимиз, — деди навбатдаги жабрланувчи.
Яна бир жабрланувчи судланувчилар қамоқда ўтирган бўлса ҳам, уларни кўришни истаган онаси судга келса, уни кўра олишини, аммо шу сироп сабаб вафот этганларнинг ота-онаси дунёларни берса-да, болаларини кўролмаслигини айтди.
Фарзандим ҳозирги кунда на кўради ва на эшитади. Уни даволатиш учун менга катта маблағ керак. Унисидан, бунисидан қарз олиб, шу кунгача қилдим. Муаммони тезроқ биз томонга ҳал қилиб, пулни олиб берсаларингиз, мен ҳам, бошқалар ҳам фарзандимизни даволатар эдик, — деди у.
Жабрланувчиларнинг бошқаси адвокатларнинг гапидан ранжишганини, улар фарзандининг ўлими учун ёки бетоб бўлиб қолгани учун судланувчилардан пул ундириш фикридан йироқлигини, фақат фарзандининг даволаниши учун шу пулларни ўз вақтида олишлари кераклигини таъкидлади.
Бу ерда бир миллиард сўмга қараб ўтирганлар йўқ. Менга боламни соғайтириб беришсин, олдинги ҳолатига қайтаришсин, бир сўм пули керак эмас. Боламнинг аввалги ҳолатини қайтариб беришса, 100 миллион эмас, 300 миллион сўм бераман. Фақат болам соғайса бўлди. Фарзандим ҳозир умуман оғриқни ҳис қилмайди. Укол қилинса ҳам, кулиб туради. Сабаби унда ҳис қилиш йўқ. Унинг аҳволи жуда оғир. Тезроқ даволатишим керак, — деди жабрланувчи ота.
Жабрланувчи оналардан бири Муштарий Абдураҳмонова кўпчилик суд қарорига кўра, уларга 1 миллиард сўмдан тўлаб берилган, деган гаплар юрганини, аммо улар шу кунгача умуман пул олишмаганини айтди.
Майли, ҳеч кимга қаршилигимиз йўқ. Гаров пулини тўлаб, чиқишсин. Келишилган ҳолатда. Розимиз, — деди у.
Яна бир жабрланувчи эса вафот этган набирасининг даволаниши учун 1 миллиард сўм сарфлаганини, Кариевнинг онаси шу пулни тўлаб берса ҳам, қилинган харажатни тўлаб берган бўлишини айтди.
Шу пулни берса ҳам, ўзимизнинг боламизни даволатиш учун кетган харажатни беришган бўлади. Кариевнинг онасига қўшилганимизнинг сабаби — ҳеч бўлмаса, зараримизни қоплаш ниятимиз борлигидир. Ҳалигача қарзим бор. Узолмайман бунча қарзни. Кариевнинг онаси мард бўлиб, шу гапни айтди. Бу гапни бизга ҳеч ким айтмаган. Бизга зарарни ундириб берсангиз, нафақат Кариев, бошқаларни ҳам қўйиб юборишингизга қаршимасман. Бизга уларнинг қамалишидан фойда йўқ, — деди жабрланувчи.
Жабрланувчиларни тинглаган судья Кариевнинг адвокатларига мурожаат қилар экан, товон пули тўланиши борасида ҳеч кимга ҳеч қандай топшириқ беришга ваколатли эмаслигини, фақат жабрланувчилар товон пули тўлансагина, Кариевга даъвоси йўқлигини айтаётганини, жабрланувчиларнинг даъвоси йўқлиги кўп нарсани ҳал қилишини таъкидлади.
Фармагентлик собиқ раҳбарининг онаси Мунира Кариева суднинг 14 июнь куни давом этган мажлисида қатнашиб, товон пулларини айтилган муддатда тўлашга тайёрлигини, фақат ўғлига нисбатан қўлланган жазо уй қамоғига ўзгаришидан умидворлигини айтганди.
Изоҳ (0)