Prezidentning tashqi siyosat bo‘yicha maxsus vakili, sobiq tashqi ishlar vaziri Abdulaziz Komilov 8-9 yil avval O‘zbekiston qo‘shni davlatlar bilan harbiy to‘qnashuvga kirishi mumkin bo‘lgani haqida gapirdi. Bu haqda u "Ishonch.uz" nashriga bergan intervyusida aytib o‘tgan.
Sobiq tashqi ishlar vaziri o‘z so‘zida “o‘zimizning vaziyatni eslab o‘tdi”.
“2016–2017-yillarda biz qo‘shni davlatlar bilan aloqalar keskinlashib ketganida bitta xavfli nuqtaga kelib taqaldik. Vaziyat o‘sha shaklda davom etganida harbiy to‘qnashish ham turgan gap edi.
Muhtaram Shavkat Miromonovich Mirziyoyev prezidentlikka kelganlarida, Markaziy Osiyo – bizning ustuvor yo‘nalishimiz tashqi siyosatimizda, deb belgilab berdilar. Nega deganda ko‘p muammolar yig‘ilib qolgandi. Bunga qo‘shimcha o‘zimiz ham o‘z qo‘limiz bilan, ochiq aytish kerak, ko‘p muammolarni yaratdik. Agar bular hal bo‘lmaganida, keskinlashib ketganida, juda yomon oqibatga olib kelardi. Shuni inobatga olib muhtaram prezidentimiz 2017-yili BMT minbarida turib siyosatimizning ustuvor yo‘nalishlari Markaziy Osiyo bo‘lishini aytdilar. Va juda muhim tashabbusni ilgari surdilar. Bu - Markaziy Osiyo davlatlari rahbarlari bilan maslahat uchrashuvlarini o‘tkazish. Hamma rahbarlar bu tashabbusni qo‘llab-quvvatlashdi”, deydi Abdulaziz Komilov.
2022-yilning aprelida Abdulaziz Komilov tashqi ishlar vaziri lavozimidan ketgan edi. U 2012-yildan beri O‘zbekiston tashki ishlar vaziri sifatida faoliyat yuritib kelgan.
2024-yilda Turkmaniston prezidenti Serdar Berdimuhamedov O‘zbekistonning sobiq tashqi ishlar vaziri, ayni paytda prezident huzuridagi Xavfsizlik kengashi kotibi o‘rinbosari Abdulaziz Komilovni Turkmaniston va O‘zbekiston o‘rtasidagi do‘stlik va hamkorlikni mustahkamlashga qo‘shgan salmoqli hissasi uchun taqdirlagan edi.
2025-yilning aprelida esa Abdulaziz Komilov Italiyaning eng yuqori davlat mukofoti — “Italiya Respublikasi oldidagi xizmatlari uchun” ordeni bilan taqdirlandi.
Izoh (0)