Raqobatni rivojlantirish va iste’molchilar huquqlarini himoya qilish qo‘mitasi raisi saylandi

Halilillo To‘raxo‘jayev Raqobatni rivojlantirish va iste’molchilar huquqlarini himoya qilish qo‘mitasi raisi etib saylandi.

Senatning 53-yalpi majlisida Raqobatni rivojlantirish va isteʼmolchilar huquqlarini himoya qilish qo‘mitasi raisini saylash masalasi ko‘rib chiqildi va Halilillo To‘raxo‘jayev ushbu lavozimiga saylandi.

Halilillo To‘raxo‘jayev bunga qadar 2021-yil yanvaridan buyon oliy sud raisi o‘rinbosari — fuqarolik ishlari bo‘yicha sudlov hay’ati raisi lavozimida ishlab kelayotgandi.

Yangi tahrirdagi Konstitutsiyaning 95-moddasi hamda 109-moddasiga muvofiq prezident taqdimiga binoan Raqobatni rivojlantirish va isteʼmolchilar huquqlarini himoya qilish qo‘mitasi raisi Senat tomonidan saylanadi.

Raqobatni rivojlantirish va iste’molchilar huquqlarini himoya qilish qo‘mitasi raisi lavozimida 2022-yil dekabr oyidan buyon Shohrux Shorahmedov ishlab kelayotgandi. U 2023-yilning noyabrida egallab turgan lavozimidan ozod etildi.

Shavkat Mirziyoyev o‘sha yilning noyabr oyida o‘tkazgan yig‘ilishda yirik savdo tarmoqlarida mahalliy ishlab chiqaruvchilarga teng sharoit yaratilmagani, ulardan mahsulot pulini olishdagi muammolar, aholida mahsulot sifati va narx-navosi bo‘yicha shikoyatlar ko‘pligi Raqobat qo‘mitasi faoliyatidagi jiddiy kamchiliklardan dalolat ekanini aytgandi.