Ukraina xorijiy davlatlarni Ikkinchi jahon urushi qurbonlarini munosib xotirlashga hamda Moskvadagi paradda harbiylari ishtirokidan voz kechishga chaqirdi. Mamlakat Tashqi ishlar vazirligi tegishli bayonot berdi.
Bugun fashizm ustidan g‘alaba qozongan xalqlardan biri bo‘lgan, Yevropada tinchlik va ozodlik uchun dahshatli badal to‘lagan Ukraina xalqiga qarshi shafqatsiz va asossiz bosqinchilik urushi olib borilmoqda. Ushbu tajovuz davomida rus askarlari yuz minglab harbiy jinoyatlar sodir etdi, 620 kishini o‘ldirdi va deyarli 2 ming kishini yarador qildi, kamida 20 ming ukrainalik bolani deportatsiya qildi, deyiladi bayonotda.
Vazirlik Rossiya armiyasi Ukrainada Ikkinchi jahon urushidan beri Yevropa ko‘rmagan darajadagi vahshiyliklarni amalga oshirayotganini va aynan shu armiya 9-may kuni Moskvaning Qizil maydonida paradga chiqishini ta’kidladi.
Bu odamlar Yevropaning xaloskorlari emas, ular bosqinchilar va harbiy jinoyatchilardir. Ular bilan yonma-yon yurish — bu natsizm ustidan qozonilgan g‘alabani sharaflash emas, balki o‘ldirilgan ukrainalik bolalar, tinch aholi va harbiylar qoni uchun javobgarlikni bo‘lishishdir. Rossiya o‘z harbiy jinoyatlarini oqlash va tajovuzini asoslash uchun xorijiy harbiy xizmatchilarni 9-may paradida ishtirok etishga taklif qilmoqda, deyiladi bayonotda.
Ukraina xorijiy harbiylarning paradda ishtirok etishini nomaqbul deb hisoblaydi. Kiyev buni natsizm ustidan qozonilgan g‘alaba xotirasiga, 80 yil oldin mamlakatni va butun Yevropani natsizmdan ozod qilgan millionlab ukrainalik frontchilar xotirasiga nisbatan haqorat sifatida baholaydi.
Barcha xorijiy davlatlarni o‘z harbiy xizmatchilarini 9-may kuni Moskvada bo‘lib o‘tadigan paradda ishtirok etishdan tiyishga chaqiramiz. Bu, ayniqsa, Rossiyaning Ukrainaga qarshi tajovuziga nisbatan betarafligini e’lon qilgan yoki xalqaro munosabatlarda doimiy ravishda neytral pozitsiyani egallab kelgan davlatlarga taalluqlidir. Bunday mamlakatlar harbiylarining qo‘shma paradda ishtiroki e’lon qilingan neytrallikni to‘g‘ridan-to‘g‘ri buzadi va tajovuzkor davlatni qo‘llab-quvvatlash bo‘lib ko‘rinadi, deyiladi xabarda.
Rossiya prezidenti yordamchisi Yuriy Ushakovning ma’lum qilishicha, paradda Ozarbayjon, Vyetnam, Belarus, Misr, Qozog‘iston, Xitoy, Qirg‘iziston, Laos, Mo‘g‘uliston, Myanma, Tojikiston, Turkmaniston, O‘zbekiston kabi 13 davlatdan harbiylar ishtirok etadi.
Izoh (0)