Ўзбекистонда 3 март куни имзоланган қонун билан қурилиш майдонларида атмосфера ҳавосини муҳофаза қилиш талабларига риоя этмаганлик учун жавобгарлик белгиланди.
Қонунга кўра, Маъмурий жавобгарлик тўғрисидаги кодексга қурилиш майдонларида атмосфера ҳавосини муҳофаза қилиш талабларига риоя этмаганлик учун жавобгарликни белгиловчи қўшимчалар ва ўзгартириш киритилди.
Ўлчами беш юз квадрат метр ва ундан ортиқ бўлган қурилиш майдонида, унга туташ бўлган ҳудудда ҳамда ундан чиқиш йўлларида чанг ва қум заррачаларининг ҳавога кўтарилишини бартараф этишга доир мажбурий талабларни бузиш ёхуд ушбу ҳудудларда ифлослантирувчи моддаларнинг йўл қўйиладиган доирадаги нормативлардан ортиқ даражада атмосфера ҳавосига чиқарилишига йўл қўйиш мансабдор шахсларга БҲМнинг 10 баравари — 3 миллион 750 минг сўм миқдорида жарима солишга сабаб бўлади.
Худди шундай ҳуқуқбузарлик маъмурий жазо чораси қўлланганидан кейин бир йил давомида такрор содир этилган бўлса, мансабдор шахсларга БҲМнинг 50 баравари — 18 миллион 750 минг сўм миқдорида жарима солишга сабаб бўлади.
Қонун расмий эълон қилинган кундан эътиборан 3 ой ўтгач кучга киради.
Ўзбекистонда қурилиш майдонларида атмосфера ҳавоси талабларини бузганларни жаримага тортилиш режаси 2024 йилнинг декабрида маълум қилинганди. Тегишли жавобгарлик кўзда тутилган қонун Олий Мажлис Қонунчилик палатаси томонидан 2025 йил 24 январда қабул қилиниб, Сенат томонидан 20 февралда маъқулланганди.
Изоҳ (0)