27 октябрь куни бўлиб ўтадиган сайловларга тайёргарлик жараёнларида Ўзбекистон Экологик партияси раиси Абдушукур Хамзаев партиянинг сайловолди дастурларида илгари сурилаётган асосий ғояларга қисқача тўхталиб ўтди.
Сўнгги йилларда нафақат Ўзбекистонда балки, бутун дунёда иқлим ўзгариши, яшил ҳудудларнинг қисқариши, сув танқислиги ва бошқа глобал экологик муаммолар кузатилаётган бир вақтда давлатнинг экологияни асраб авайлаш соҳасидаги иштироки долзарб аҳамият касб этиб боради.
Ўзбекистонда Экологик партияси раиси мамлакатимизда қурилиш объектларидаги мавжуд, кўкариб турган кўп йиллик дарахтларни кўчириб ўтказиш амалиётига ҳам кўп гувоҳ бўлинаётганини таъкидлади.
У нафақат сиёсий партия раиси балки соҳа мутахассиси сифатида Ўзбекистон шароитида япроқбаргли дарахтлар 10 ёшдан сўнг кўчирилганда тутиб кетиши эҳтимоли жуда пастлигини маълум қилди.
“Тан олиб айтиш керакки, Маъмурий жавобгарлик тўғрисидаги кодексда дарахтлар, буталар ҳамда бошқа ўсимликлар ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказганлик учун белгиланган жазонинг кучайтирилганига қарамай кўрилаётган чоралар экологияга етказилаётган зарарга мутаносиб эмаслигича қолмоқда.
Бизнинг партия мазкур масалада хорижий давлатларнинг қонунчилик амалиётини ҳисобга олган ҳолда Жиноят кодексининг экинзорларни, ўрмонларни, дарахтлар ёки бошқа ўсимликларни шикастлантириш ёхуд нобуд қилганлик учун жиноий жавобгарликни назарда тутувчи 198-моддасини қайта кўриб чиқиш ҳамда алоҳида янги модда билан дарахтларни, буталарни, бошқа ўсимликлар ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказганлик учун ҳам жиноий жавобгарликни кучайтириш зарур, деб ҳисоблайди.” – Абдушукур Хамзаев.
Шунингдек, партиянинг сайловолди дастурида қурилиш жараёнларидан дарахтларни асраб қолиш, кўчириб ўтказмаслик бўйича аниқ чоралар, дарахтларни ноқонуний кесган тадбиркорларнинг, керак бўлса, ерга бўлган ҳуқуқини бекор қилишгача бўлган жавобгарликни қўллаш таклифлари назарда тутилганлиги маълум қилинди.
Бундан ташқари, бугун атмосфера ҳавосига ташланмаларнинг 1,3 миллион тоннаси ёки 58 фоизи транспорт воситалари, 924 минг тоннаси (42 фоизи) саноат корхоналари ҳиссасига тўғри келаётганлиги инобатга олиб, дастурда атмосферага чиқадиган зарарли газларни 2 баробарга камайтириш бўйича аниқ ташаббуслар киритилганлиги таъкидланди.
Изоҳ (0)