Ўзбекистонда мажбурий аттестацияга жалб этилмайдиган педагоглар рўйхати кенгайди

Вазирлар Маҳкамасининг 28 февралдаги қарори билан ҳукуматининг айрим қарорларига педагогларни аттестациядан ўтказиш, касбий сертификатлаш ва рағбатлантиришга тизимини такомиллаштиришга қаратилган ўзгартириш ва қўшимчалар киритилди.

Қарорга кўра, Ўзбекистонда 2025 йил 1 сентябргача қуйидаги педагоглар мажбурий аттестацияга жалб этилмайди:

• олий малака тоифасига (бош ўқитувчи лавозимига) эга бўлганидан сўнг ушбу тоифани (лавозимни) 15 йил давомида сақлаб келган ва узлуксиз иш стажига эга бўлган;
• педагогик фаолият бўйича 25 йил ва ундан кўп иш стажига эга бўлган;
• ёшга доир пенсияга чиқиши учун 5 йилдан кўп бўлмаган вақт қолган;
• педагогик фаолият билан шуғулланаётган пенсия ёшига тўлган педагоглар;

Уларга амалдаги малака тоифаси (лавозими) бўйича ҳақ тўланади.

2025 йил 1 сентябргача қуйидаги талаблардан бирига жавоб берадиган педагогларга тўғридан-тўғри малака тоифаси берилади:

• педагогик фаолият бўйича 25 йил ва ундан кўп иш стажига эга бўлган педагогларга – уларнинг амалдаги малака тоифаси (лавозими);
• ёшга доир пенсияга чиқиши учун 5 йилдан кўп бўлмаган вақт қолган педагогларга – уларнинг амалдаги малака тоифаси (лавозими);
• олий малака тоифасига (бош ўқитувчи лавозимига) эга бўлганидан сўнг ушбу тоифани (лавозимни) 15 йил давомида сақлаб келган ва узлуксиз иш стажига эга бўлган педагогларга – олий малака тоифаси (бош ўқитувчи лавозими).

Бунда педагоглар ўз хоҳишига кўра навбатдан ташқари аттестациядан ўтиб, малака тоифаси (лавозими) оширилган тақдирда, уларга янги тасдиқланган малака тоифаси (лавозими) бўйича сертификатнинг амал қилиш муддати давомида ҳақ тўланади.

Ҳужжат билан шунингдек, қуйидагилар назарда тутилмоқда:

• таълим ташкилотларида фаолият юритаётган мусиқа маданияти ва жисмоний тарбия фани педагоглари, пенсия ёшидаги педагоглар ҳамда олий маълумотга эга бўлмаган педагогларни аттестациядан ўтказиш;
• Мактабгача ва мактаб таълими вазирлиги тизимида фаолият юритаётган малакали педагог кадрлар ва илғор ходимларни рағбатлантириш;
• Мактабгача ва мактаб таълими вазири жамғармаси фаолиятини такомиллаштириш.

Президентнинг 2023 йил 26 майдаги фармонига мувофиқ халаро стандартлар асосида малака сертификатини олган педагог кадрларга тариф ставкаларининг амалдаги миқдорига нисбатан 70 фоиз миқдорида қўшимча ҳақ тўланиши белгиланган.