Ижтимоий тармоқларда “электр энергияси истеъмоли 200 киловаттдан ошса, ҳар бир киловатт учун 900 сўм эмас, 540 сўмдан тўланади” мазмунидаги маълумот тарқалмоқда. Энергетика вазирлиги бунга изоҳ берди.
Унда билдирилишича, бу Вазирлар Маҳкамасининг 2024 йил 27 декабрда имзоланган 894-сон қарори бандларининг нотўғри талқин қилиниши туфайли юзага келмоқда. Ҳужжатда ҳисоб-китоб даврида истеъмолчилар томонидан (маиший истеъмолчилардан ташқари) электр энергияси истеъмоли шартномавий миқдордан 20 фоиз ва ундан ортишига йўл қўйилган тақдирда, ортиқ истеъмол қилинган электр энергияси учун белгиланган тарифнинг 1,2 баравари миқдорида қўшимча тўлов ундирилиши белгиланган.
“Бу юридик истеъмолчилар ўзлари учун белгиланган лимитдан 20 фоиз ва ундан кўп миқдорда электр энергияси (табиий газ эмас!) истеъмол қилганларида, ортиқча ишлатилган ҳар бир кВт/соат учун қўшимча 20 фоиз миқдорида ҳақ тўлашлари лозимлигини англатади (бунга қадар икки баравар ҳақ тўлашлари кўзда тутилган эди)”, дея изоҳ берди вазирлик.
Хусусан, техник шартида бир ой мобайнида 100 минг кВт/соат электр энергияси сарфлаши кўзда тутилган ишлаб чиқариш цехи ой мобайнида 125 минг кВт/соат электр энергияси истеъмол қилса, ортиқча ишлатилган 5 минг кВт/соат учун 900 сўмдан эмас, 1080 сўмдан тўлов қилади.
Аҳоли истеъмолчилари III тариф гуруҳига мансуб бўлиб, маиший истеъмолчилар саналади. Қоидаларнинг тегишли бандида “маиший истеъмолчилардан ташқари” дея кўрсатиб ўтилган.
“Айрим блогерларнинг қарор моҳиятини тўла англаб етмай туриб, нотўғри маълумот тарқатишлари туфайли аҳоли орасида турли тушунмовчиликлар пайдо бўлмоқда. Биз блогер ва журналистларни ижтимоий масъулиятли бўлишга, хайп ортидан қувиб, ўзлари тушуниб етмаган маълумотни тарқатишдан тийилишга чақирамиз”, дейилади хабарда.
Шавкат Мирзиёев 2024 йил 20 август куни тадбиркорлар учрашувда барча саноат корхоналари электр ва газга ўрнатилган лимит ошиб кетса, тўлов икки карра кўп ундирилаётганидан норози бўлаётганини айтганди. “Саноатимизнинг ўсишига таъсир қиладиган бундай чекловлар қисқартирилиши белгиланди. Энди электр ва газ истеъмоли лимитдан 20 фоизгача ошиб кетса ҳам базавий тариф сақланиб қолади. Агар истеъмол 20 фоиздан ўтиб кетса, ошган қисмига тўлов 20 фоиз қимматлашади”, деган эди президент.
Ўзбекистонда электр энергияси бўйича тадбиркорларга солинадиган жарималар миқдорини қайта кўриб чиқиш ҳам кўзда тутилмоқда. Шунингдек, жаримадан қарздорлиги ҳисобига тармоқдан узиш ўрнига бўлиб-бўлиб тўлаш имкониятини бериш режалаштирилмоқда. Бу ҳақда президентнинг бизнес учун тенг шароит ва адолатли рақобат муҳитини таъминлашга қаратилган фармонидаги “Йўл харитаси”да белгиланди.
Изоҳ (0)