Ижтимоий тармоқларда Энергетика вазирлиги топшириғи билан электромобилларни қувватлаш станциялари ўчириб қўйилаётгани ҳақида хабарлар тарқалди. Ҳолат юзасидан вазирлик матбуот хизмати раддия берди.
Маълум қилинишича, Энергетика вазирлиги электромобилларни зарядлаш станцияларини тармоқдан узиш бўйича ҳеч қандай топшириқ бермаган. Ижтимоий тармоқлардаги хабарлар мутлақо асоссизлиги айтилди.
Раддияга кўра, айни пайтда мамлакатда генерация, яъни электр энергияси ишлаб чиқариш бўйича ҳеч қандай муаммо йўқ.
“Ишлаб чиқарилаётган электр энергияси эса ўз эҳтиёжимизни тўлиқ қоплашга етади. Энергетика вазирлиги қувватлаш станцияларини тармоқдан узиш бўйича топшириқ бермаган.
Шуни алоҳида айтиш керакки, Энергетика вазирлиги экологиямизни асрашга катта ҳисса қўшадиган электромобилларни Ўзбекистонда оммалаштириш тарафдори”, дейилади хабарда.
Электромобильларни қувватлаш станцияларини ўрнатган тадбиркорлик субъектларининг қонуний фаолиятларига тўсқинлик қилиш ҳолатларига дуч келинганда, вазирликнинг +99871-231-16-61 (ички 7037, 7046 ва 7057) рақамли “Ишонч телефонлари”га мурожаат қилиш сўралмоқда.
9 декабрь куни Энергетика вазирлиги метан заправкалар фаолиятига чеклов киритилиши ҳақида хабар берганди. Кейинроқ биржа савдоларига чиқарилаётган бензин ҳажми вақтинчалик икки карра оширилиши айтилди.
“Дарё” чеклов минглаб ҳайдовчиларнинг соатлаб кўчада ўтиришига, ёнилғисиз қолиб кетишига сабаб бўлаётгани ҳақида репортаж тайёрлаганди.
Изоҳ (0)