Таниқли хонанда Шаҳноза Отабоева “Миллий” телеканалининг “Аёл қалби” кўрсатувига берган интервьюсида санъатдаги танаффуси, шахсий ҳаёти ва оналик масъулияти ҳақида гапириб берди.
Шаҳнозанинг айтишича, у санъатдан вақтинча чекинишга мажбур бўлган. Бу танаффус оилавий ташвишлар ва фарзандлар тарбияси билан боғлиқ бўлган. Кўплаб санъаткорлар санъатдан кетиб, бир муддатдан сўнг яна қайтган, бироқ уларнинг бу қайтиши ҳар доим ҳам муваффақиятли бўлмаган.
Мен яна санъатга қайтиб, зўр бўлиб кетдим, дея олмайман. Аслида, бу қайтишим руҳий тушкунликлардан чиқиш, ичимдаги оғриқни ижод орқали чиқариш эди, дейди хонанда.
Шаҳноза аёл кишининг ҳаётида ҳар хил даврлар бўлишини таъкидлади. Баъзиларнинг ҳаёти чиройли кечса, бошқаларида у нотекис бўлади. Буни англаш эса вақт талаб қилади.
Оилам бузилиши арафасида атрофимдагилар “сен ижодни тўхтатиб қўйдинг, ҳаётинг фақат бола-чақа бўлиб қолди, ахир сен Шаҳноза Отабоевасан-ку” каби сўзлар билан ўзини дўст кўрсатиб ҳаётимни бузганлар ҳам бўлди, дейди у.
Хонанда ажрашганидан кейин ҳаёти изга тушганини, вақтини чиройли ўтказа бошлаганини айтди. У меҳнати билан фарзандларини оёққа турғизганини таъкидлади.
Шаҳнозага 2-хотинлик таклифи ҳам тушган. Бироқ у ҳеч қачон бошқа аёлнинг бахти ҳисобига турмуш қуришни хоҳламаган.
Мен бировнинг оиласини бузиб, унинг бахтсизлиги эвазига ўз бахтимни қурмоқчи эмасман, дейди у.
Хонанда собиқ турмуш ўртоғи билан ажрашгани ҳақида ижтимоий тармоққа видео жойлайди. Ўша видеодан кейин совчилар, турмушга чиқиш таклифлари кўпайганини айтди.
Шу пайтда ўзимга савол бера бошладим: Ҳа, мен ҳозир турмушга чиқишим мумкин. Лекин болаларим-чи? Менга таклиф билдирмоқчи бўлган инсон улар учун оталик қила олармикан? Ахир фарзандларимнинг юрагида ҳали ҳам ўз оталарига нисбатан илиқ туйғулар бор. Бу табиий. Мен учун эса ҳар бир таклиф ортида фақат “турмуш қуриш” эмас, балки бутун бир ҳаёт тарозига тушади: у инсон болаларимни чин юракдан қабул қила оладими? Уларга меҳр бера оладими? Мен учун ҳам бу муҳим — биринчи ўринда фарзандларим туради, таъкидлади у.
Бундан олдин собиқ турмуш ўртоғи билан ярашиб, қайта ажрашганини ҳам яширмади. Аммо бу ярашув узоққа бормаган. Унинг айтишича, кўплаб туҳматларга қолгани ва собиқ турмуш ўртоғининг “Нега ярашганимизни оммага олиб чиқмаяпсан, ҳаётингда бошқа одам борми?” деган саволлари бу муносабатни яна издан чиқарган.
Биз болалар учун яна бир бор уриниб кўрдик, лекин барибир ажрашдик. Ҳозирда дўстона муносабатдамиз, дейди хонанда.
Хонанда, агар ҳаётга қайта келиш имконияти бўлганида, санъат соҳасига умуман кирмаслигини, балки оддий ҳаётни танлаб, оддий аёл сифатида яшашни хоҳлаганини айтди.
20 ёшга қайтишни жуда хоҳлардим. Агар шундай имкон бўлганида, санъатни эмас, оддий ҳаётни танлаган бўлардим. Ҳатто стюардесса бўлишни истаганман, дейди у афсус билан.
Шаҳноза ёш аёлларга сабрли бўлишни маслаҳат берди. Унинг фикрича, икки-уч йил вақт дегани ҳаёт учун унчалик катта бўлмаган муддат. Олдин камида 10-15 йил яшаб кўриб, кейин қарор қабул қилинг, дейди у.
У реалист эканини, муҳаббатга эмас, ҳақиқатга асосланган ҳаёт кечириш тарафдори эканини ҳам таъкидлади. Нилуфар Усмонованинг бир сўзини иқтибос келтириб, ҳаётдаги қийинчиликлар уни ўзининг асл ҳолатига қайтарганини айтди.
Мени ғам-ташвиш семиртириб юборганди. Ажрим эса мени яна асл Шаҳнозага қайтарди, дейди у.
Хонанда интервью якунида “Ўзим учун эмас, фақат фарзандларим учун яшашга ўрганиб қолдим”, дейди.
Изоҳ (0)