Бир муддат аввал ўзбекистонликлар бариатрик жарроҳлик учун Туркияга сафар қиларди. Ҳозирда бу жарроҳлик амалиёти Ўзбекистонда ҳам амалга ошириляпти. Масалан, озарбайжонлик шифокор хусусий клиникаларнинг бирига ташриф буюриб, рўйхатдан ўтган беморларни қабул қилади. Жарроҳлик харажатлари 4500 АҚШ долларини ташкил этади. Ўзбек шифокорларининг бариатрик жарроҳлик амалиёти эса 3500 АҚШ доллар эвазига ўтказиляпти.
Кейинги пайтларда ошқозонини жарроҳлик йўли билан қисқартириш натижасида ҳайратланарли даражада озган санъат вакиллари ҳақидаги хабарлар тез-тез қулоққа чалиняпти. Хўш, таниқли аёллардан кимлар бу жарроҳлик амалиётини бошидан ўтказди ва натижалар кутилганидек бўляптими? Бу ҳақда уларнинг ўзлари билан суҳбатлашамиз.
Зуҳра Солиева: «Менга спорт ёрдам бермади»
— Семириш ҳар доим ҳам овқат кўп истеъмол қилиш ва кам ҳаракатлиликдан юзага келмайди. Унга бошқа омиллар, хусусан, эндокрин безлар фаолиятининг ёмонлашуви ҳам сабаб бўлиши мумкин. Икки-уч йил аввал шифокорга мурожаат қилганимда, менда гармон бузилиши содир бўлаётганидан огоҳлантирган эди. Уни бир неча йил давомида дори-дармонлар билан ҳам даволаш мумкин, аммо бу ҳар доим ҳам самара беравермас экан. Шу боис менга жарроҳлик амалиётини тавсия қилишди.
Ҳаётда у қадар иштаҳали инсон эмасман, бундан ташқари, кунимнинг энг камида ўн соати ҳаракатда ўтади. Айни карантин даври кучайтирилган пайтда уйдан чиқмай, кунига 7-8 соат жисмоний машғулотлар билан шуғулландим. Энг алам қилгани, бир грамм ҳам вазн йўқотмадим. Кейин билсам, бу хасталикнинг сабаби бошқа экан. Текширувлардан сўнг мени камида қирқ килограмм вазн ташлашим кераклигини айтишди. Ошқозонни кичрайтириш операциясидан кейин илк ойда 15 кило вазн ташладим. Ҳозир қанчалик хурсандлигимни тасвирлаб беролмайман. Чунки аввалги кийимларимга иккинчи Зуҳра бемалол сиғадиган натижага эришдим, — дейди актриса Зуҳра Солиева.
Феруза Жуманиёзова: «Саломатлигим ёмонлашганини яширмайман»
— Кўпчилик бариатрик жарроҳлик амалиётини чирой учун қилди, деб ўйлашади. Аммо бу саломатлигимни тиклашим учун ҳам зарур эди. Саломатлигимда ўзгариш бўлганини ҳеч қачон яширмайман. Қоматдаги ўзгариш ҳам фақат инсоннинг иштаҳаси билан эмас, балки соғлиғи билан ҳам боғлиқ бўлиши мумкин.
Ошқозонни кичрайтириш амалиёти бутун дунёда ўтказилади. Қандли диабет хасталигига чалинганлар ҳам бу амалиётни бошидан ўтказишади. Парҳез ва жисмоний машқ ҳам озишга ёрдам беради, аммо барибир кутилган натижага эришиш мушкул.Яширмайман, операциядан кейин иммунитетим бирдан тушиб кетди. Ҳолсизланиб қолдим. Аммо аста-секин ҳаммаси яхшиланяпти. Ўзимни аввалгидек енгил ва ғайратли ҳис қиляпман. Жарроҳликдан кейинги аввалги ойларда катта вазн йўқотилади, нормал вазнга эришгач тўхтайди, — дейди хонанда Феруза Жуманиёзова.
Шаҳноза Отабоева: «Семизлик сабаб одамлардан уялардим»
— Касбим сабаб ҳамиша одамлар орасида бўлишимга тўғри келади. Аммо жарроҳликдан аввал кўчага чиқишни ҳам истамасдим. Ҳатто одамлардан уялганим учун қочиб юрардим. Дугоналарим учрашувга чақиришса, бормаслик учун баҳона излардим. Операциядан кейин ҳаммаси ўзгарди. Яшашга бўлган муҳаббатим янада ортди. Операциядан кейинги ойда 15 кило вазн ташладим, иккинчи ой эса 5 килога оздим. Тери осилиб қолиш жараёнлари бўлмади, ҳаммаси аъло. Илгари қон босимнинг ошиши, оёқ оғриқларидан азият чекардим.Ҳозир эса ҳаммаси жойида. Аммо шунда ҳам диета ва жисмоний ҳаракатларга алоҳида эътибор беряпман. Яшаш тарзимни бутунлай ўзгартирдим. Оз-оздан тез-тез овқатланяпман. Зарарсиз маҳсулотларни истеъмол қилишга ҳаракат қиляпман. Жарроҳлик амалиётини бошдан кечириш қийин, аммо бундан бошқа чорам қолмаганди, — дейди хонанда Шаҳноза Отабоева.
Мадина Бозорова: «60 кило вазн йўқотдим»
Мадина Бозорова асли мутахассислиги бўйича стилист бўлса-да, бир нечта хонандаларнинг клипларида суратга тушган. Айниқса, Шоҳруххоннинг «Қўғирчоқ» клипидаги иштироки томошабинлар эътиборига тушган.
— Асли касбим грим устаси бўлган. Ҳамиша санъаткорлар даврасида бўлганим учун жуда кўп клипларда суратга тушганман. Шоҳруххоннинг «Қўғирчоқ» клипидаги иштироким омадли чиққанди. Охирги йилларда вазним кескин ортиб кетгани учун бу соҳани тарк этишимга ҳам тўғри келди. Озиш учун ҳамма чорани қўллаб кўрганман. Минг машаққат билан озаман, кейин бирдан вазним икки баробар ортарди. Бу жиддий хасталик эканлигини айтишганидан сўнг, ошқозонимни қисқартиришга мажбур бўлдим. Шу кунгача 60 кило вазн ташладим. Бу бир йилда супер натижа. Ошқозоним оғримайди. Аммо сочим тўкиладиган бўлиб қолди. Шифокорлар бу иммунитет тушиши билан боғлиқ, дейишди. Санъатдан кетиб, ҳозирда декор соҳасида фаолият юритяпман, — дейди Мадина Бозорова.
Камола Орипова: «Жарроҳликдан сўнг она бўлдим»
Марҳум хонанда Мўмин Ориповнинг рафиқаси Камола Орипова Instagram фойдаланувчиларига яхши таниш. Унинг саҳифасини 1,5 миллион обуначи кузатади. Камола сочларни кератин ёрдамида силлиқлаш бўйича мутахассис. У айни кунларда Истанбулдаги гўзаллик салонида фаолият юритяпти.
— Нега ошқозон операциясини қилишга мажбур бўлганимни одамлардан яширмаганман. Чунки ҳамма аёл гўзал қомат эгаси бўлишга ҳақли. Ошқозон операциясини 2020 йилнинг 8 февраль санасида қилдирганман. Бир йилда 43 кило вазн йўқотиб, ўзимни енгил ҳис қилдим. Ундан кейин қизим Марямхон дунёга келди. Ҳозир ҳам ҳомиладорлик билан боғлиқ жараённи бошдан кечиряпман. Ҳаддан ортиқ тўлишиб кетганим йўқ. Яна 10 кило озиш ниятим бор. Фақат бу режани бир неча ойга ортга суриб туришимга тўғри келди, — дейди Камола Орипова.
Моҳина Заполская: «Афсусдаман»
Моҳина Заполская «Зирапча» реалити-шоусидаги иштироки билан халқимизга яхши таниш. У бир неча йилдан буён кўчмас мулк савдоси ва қурилиши билан шуғулланади. Моҳина кўрсатувдаги иштирокидан сўнг «Мени асра» сериалида ҳам суратга тушган.
— Ошқозонимни кичрайтирганимга бироз афсусландим. Чунки ундан кейинги азоблар тасаввур қилиб бўлмас даражада экан. Шундай бўлишини билганимда, ҳеч қачон операцияга розилик бермасдим. Бундай азоблангандан кўра, семириб юрганим яхши эди. Озяпман, аммо бир ҳафта деганда ўзимга келдим. Майли, ҳаммаси яхшиликка. Ҳали кескин озганимча йўқ. Ишқилиб, шунча ҳаракатга яраша озай-да, деб турибман, — дейди Моҳина Заполская.
Изоҳ (0)