Шавкат Мирзиёевнинг 2024 йилдаги тадбиркорлар билан очиқ мулоқоти Қорақалпоғистонда бўлиб ўтади. Бу ҳақда президентнинг 30 майдаги қарорида кўзда тутилган.
Қарорга кўра, президентнинг тадбиркорлар билан очиқ мулоқотини ташкил қилиш бўйича республика комиссияси, шунингдек, ҳудудларда тадбиркорлар муаммоларини ўрганиш ва ҳал қилиш бўйича ишчи гуруҳлар тузилади.
15 июндан очиқ мулоқот ўтказилгунга қадар махсус электрон платформалар, Савдо-саноат палатаси ҳузуридаги Call-марказ хизмати, ижтимоий тармоқлар ва сайёр қабуллар орқали тадбиркорлар мурожаатларини тун-у кун қабул қилиш ташкил этилади.
“Тадбиркорлар билан очиқ мулоқот” электрон платформаси ишга туширилади. Шунингдек, Қорақалпоғистон Республикасида 2024 йил августида халқаро бизнес форум ҳам бўлиб ўтади.
Шавкат Мирзиёев 2021 йилдан бошлаб 20 августни Тадбиркорлар куни этиб белгилаган ва уни ҳар йили кенг нишонлашни таклиф қилган. Ўша йили президентнинг тадбиркорлар билан ўтказган илк очиқ мулоқотида ўн мингга яқин тадбиркор иштирок этганди. 2022 йилда президент қарори билан “Фаол тадбиркор” кўкрак нишони таъсис этилди ва ўша йили 71 нафар тадбиркорга ушбу кўкрак нишони топширилди. 2023 йилда бундай кўкрак нишони 126 нафар тадбиркорга берилди. Шунингдек, Ўзбекистон иқтисодий қудрати ва аҳоли фаровонлигини юксалтиришда намуна кўрсатаётган 44 нафар фуқаро давлат мукофотлари билан тақдирланиб, уларга унвон, орден ва медаллар топширилди.
Изоҳ (0)