“Ҳар бирингиз қаҳрамонсиз” — Шавкат Мирзиёев бир гуруҳ тадбиркорларга мукофотларни топширди (фото)

Шавкат Мирзиёев Тадбиркорлар куни муносабати билан соҳа вакилларидан бир гуруҳини мукофотлаш тўғрисидаги фармонни имзолаганди. 18 август куни уларни тақдирлаш маросими бўлиб ўтди. “Дарё” мухбир ушбу маросимдан фоторепортаж тайёрлади.

Тадбир аввалида Шавкат Мирзиёев ишбилармонларни ушбу байрам билан табриклаб, ўзининг чуқур ҳурмати ва эзгу тилакларини билдирди.

“Ҳар бир мамлакатда тадбиркорлар катта куч-қудрат бўлиб келган. Ўзбекистонимизда ҳам иқтисодиётни ривожлантириш, иш ўринлари яратиш, камбағалликни қисқартириш, маҳаллаларни обод этишга ҳаракат қиляпмиз. Бунга энг катта ҳисса қўшаётган ким? Тадбиркорлар! Сизлар ҳар бирингиз қаҳрамонсиз, фидойисиз. Биз сизлар билан фахрланамиз”, — деди давлат раҳбари.

Бизнесга шароитлар натижасида бу соҳа изчил ривожланаётгани қайд этилди. Ўтган бир йилда кичик тадбиркорлар сони 40 минг нафарга, ўрта тадбиркорлар сони 2 минг нафарга, йирик корхоналар сони эса 400 тага кўпайган. Берилган енгилликлардан фойдаланиб, бир йилда 155 та корхонанинг йиллик айланмаси 100 миллион доллардан ошган. Киритилган йиллик хорижий сармоялар ҳажми эса илк бор 10 миллиард долларга етган.

Президентнинг 18 августдаги фармонига мувофиқ, Ўзбекистон иқтисодий қудрати ва аҳоли фаровонлигини юксалтиришда намуна кўрсатаётган 44 нафар фуқаро давлат мукофотлари билан тақдирланди. Байрам тадбирида уларга ана шу унвон, орден ва медаллар топширилди.

Шунингдек, жойларда президентнинг 17 августдаги фармонига мувофиқ, 126 нафар илғор бизнесменга “Фаол тадбиркор” кўкрак нишони топширилмоқда.