Шавкат Мирзиёев бугун тадбиркорлар билан ўтказган мулоқотида болаликдаги орзулари ҳақида гапирди.
Очиқ мулоқотда тадбиркорлардан бири давлат раҳбаридан болалигида ким бўлишни орзу қилгани ва қандай хислатлари эвазига миллат етакчиси бўлишга эришгани ҳақида сўради. Президент инженер бўлишни орзу қилганини, пахта терувчилар меҳнати ҳамиша уни қийнаганини таъкидлади. Шунингдек, ўзбек халқини пахта қуллигидан озод этишни орзу қилганини қайд этди.
“Мен умуман инженер бўлишни орзу қилардим ва қишлоқ хўжалиги инженери бўлдим. Чунки ҳамиша пахтакорлар меҳнати мени қийнаган. Ўзбек халқини пахта қуллигидан озод этишни орзу қилганман.
Диссертациямни ҳам оладиган бўлсак, пахта териш машинасини яратганман. Дарвоқе, мен Ўзбекистон ССР Компартияси марказий комитетининг биринчи котиби Шароф Рашидов олдида тақдимот қилганман. Бу ҳам менинг ҳикоям. У билан икки марта учрашдим. Пахта териш машинаси ҳақидаги илмий ишим ҳақида гапирганимда у жудаям ҳайратда қолганди. У ушбу диссертацияни мамнуният билан қўллаб-қувватлаган ҳамда бу бўйича кўрсатмалар берган.
Қандай қилиб мамлакат раҳбари бўлиш ҳақидаги саволга келадиган бўлсак, бунинг учун ватанни севиш керак, халқни севиш керак, ўзини бутунлай бунга бағишлаш керак”, — дейди Шавкат Мирзиёев.
Изоҳ (0)