Shavkat Mirziyoyevning 2024-yildagi tadbirkorlar bilan ochiq muloqoti Qoraqalpog‘istonda bo‘lib o‘tadi. Bu haqda prezidentning 30-maydagi qarorida ko‘zda tutilgan.
Qarorga ko‘ra, prezidentning tadbirkorlar bilan ochiq muloqotini tashkil qilish bo‘yicha respublika komissiyasi, shuningdek, hududlarda tadbirkorlar muammolarini o‘rganish va hal qilish bo‘yicha ishchi guruhlar tuziladi.
15-iyundan ochiq muloqot o‘tkazilgunga qadar maxsus elektron platformalar, Savdo-sanoat palatasi huzuridagi Call-markaz xizmati, ijtimoiy tarmoqlar va sayyor qabullar orqali tadbirkorlar murojaatlarini tun-u kun qabul qilish tashkil etiladi.
“Tadbirkorlar bilan ochiq muloqot” elektron platformasi ishga tushiriladi. Shuningdek, Qoraqalpog‘iston Respublikasida 2024-yil avgustida xalqaro biznes forum ham bo‘lib o‘tadi.
Shavkat Mirziyoyev 2021-yildan boshlab 20-avgustni Tadbirkorlar kuni etib belgilagan va uni har yili keng nishonlashni taklif qilgan. O‘sha yili prezidentning tadbirkorlar bilan o‘tkazgan ilk ochiq muloqotida o‘n mingga yaqin tadbirkor ishtirok etgandi. 2022-yilda prezident qarori bilan “Faol tadbirkor” ko‘krak nishoni ta’sis etildi va o‘sha yili 71 nafar tadbirkorga ushbu ko‘krak nishoni topshirildi. 2023-yilda bunday ko‘krak nishoni 126 nafar tadbirkorga berildi. Shuningdek, O‘zbekiston iqtisodiy qudrati va aholi farovonligini yuksaltirishda namuna ko‘rsatayotgan 44 nafar fuqaro davlat mukofotlari bilan taqdirlanib, ularga unvon, orden va medallar topshirildi.
Izoh (0)