Ўзбекистон ҳаёт сифати юқори мамлакатлар қаторидан жой олди — рейтинг

Ўзбекистон CEOWORLD журнали томонидан эълон қилинган Human Progress Index (HPI) йиллик ҳаёт сифати рейтингида 196 мамлакат орасида 108-ўринни эгаллади.

2025 йил учун Инсон тараққиёти индекси (ITI) рейтинги ҳаёт сифати, кутилаётган умр кўриш давомийлиги, таълим даражаси, аҳоли жон бошига даромад, сиёсий барқарорлик, ривожланиш имкониятлари каби кенг кўламли омилларни ҳисобга олади.

Таҳлил учта асосий барқарорлик, қониқиш ва мувозанатлилик тоифалари бўйича ўтказилган. Уларнинг ҳар бири 100 баллик шкала асосида баҳоланган.

Глобал рейтинг етакчиси Швейцария бўлиб, ундан кейинги ўринларни Норвегия ва Исландия эгаллаган. Шунингдек, кучли ўнталикдан Гонконг, Швеция, Дания, Германия, Ирландия, Сингапур ва Австралия жой олган.

Ўзбекистон рейтингда 108-ўринни эгаллаб, 100 баллдан 70,94 балл тўплаган ва “ҳаёт сифати юқори” мамлакатлар тоифасига кирган. Юртимиз Марказий Осиё минтақаси бўйича рейтингда Қозоғистон ва Туркманистондан кейинги учинчи мамлакатга айланган.

Рейтингда Туркия, Черногория, Россия, Грузия, Беларусия каби давлатлар “ҳаёт сифати жуда юқори” даражасидан жой олган. Кейинги ўринларда Хитой (77-ўрин), Арманистон (78), Озарбайжон (92), Туркманистон (96), Украина (102), Ўзбекистон (108), Қирғизистон (119) эса “ҳаёт сифати юқори” мамлакатлар қаторида қайд этилган. Қўшни Тожикистон эса 63.4 балл билан 128-ўринни эгаллаган.

Рейтингни аниқлаш учун CEOWORLD журнали тадқиқотчилари 196 та мамлакатни учта асосий тоифа бўйича таҳлил қилишди ва таққослашган:

1) барқарорлик;
2) қониқиш;
3) мувозанат.

Ушбу ўлчовларни баҳолаш учун учта тоифадан бирига кирувчи 23 та кўрсаткич кўриб чиқилган. Ҳар бир атрибут 100 баллик шкала бўйича баҳоланган. Масалан, барқарорликка иқтисодий ўсиш, солиқ ставкалари, ўртача умр кўриш давомийлиги, даромад ҳамда харажатлар, уй-жой шароитлари ва бошқалар киради. Қониқишга эса хавфсизлик, бахт даражаси, коррупцияни идрок этиш, болалар ва оналар ўлими, транспорт, таълим ҳамда соғлиқни сақлаш киради. Мувозанатга инсон ҳуқуқлари, жинслар тенглиги, экологияга ғамхўрлик ва бошқалар киради.

CEOWORLD — турли мамлакатларда иқтисодиёт, инвестициялар, карьера, технологиялар, таълим ва ҳаёт сифати бўйича таҳлилий материаллар, рейтинглар ва тадқиқотларни чоп этувчи халқаро бизнес нашр ҳисобланади.