Президент Шавкат Мирзиёев Туркий давлатлар ташкилоти норасмий саммитида нутқ сўзлади. Бу ҳақда Президент матбуот хизмати хабар берди.
Давлат раҳбари олдинда аниқ вазифа турганини, яқин йилларда ўзаро савдо улушини кескин кўпайтириш лозимлигини таъкидлади. Шу мақсадда Turk-treyd онлайн платформасини яратиш ва савдони ошириш амалий дастурини қабул қилиш ташаббуслари илгари сурилди.
“Транскаспий халқаро йўлаги орқали юк ташиш ҳажмини ошириш ва божхона-чегара тартибларини соддалаштириш учун “ягона дарча” ҳамда “яшил коридорлар” тизимларини тезроқ йўлга қўйишга чақираман. Ушбу йўналишдаги ҳамкорликни кенгайтириш мақсадида ноябрь ойида Тошкентда Туркий давлатларнинг Халқаро мултимодал транспорт ва логистика форумини ўтказишни режалаштирганмиз”, деди Ўзбекистон етакчиси.
Шавкат Мирзиёев Туркий инвестиция жамғармасининг фаолияти сармоялар оқимининг фаоллашувига туртки беришини айтди.
“Биз инновацион лойиҳаларни рағбатлантириш учун қўшма венчур компаниясини ташкил этиш зарур, деб ҳисоблаймиз. Бу борада мамлакатларимизнинг инвестиция имкониятларини тўлиқ акс эттирган “Ягона инвестиция портали’ни жорий этиш мақсадга мувофиқдир”, дейди президент.
Ўзбекистон етакчиси саноат кооперацияси соҳасида амалий ҳамкорликни янги босқичга кўтариш вақти келганини ҳам билдирди.
“Бу борада кимё, энергетика, тоғ-кон, енгил саноат, фармацевтика, чарм-пойабзал, озиқ-овқат ва қурилиш соҳаларида салмоқли ишлаб чиқариш қувватларини яратиш бўйича Саноат кооперацияси дастурини ишлаб чиқишни таклиф этаман”, дея қўшимча қилди Шавкат Мирзиёев.
Изоҳ (0)