Хитойнинг Dongfeng компанияси Сурхондарё вилоятида замонавий автомобиль заводи қуришни таклиф қилди. Бу ҳақда вилоят ҳокимлиги матбуот хизмати хабар берди.
-j967zN-D.avif)
Маълум қилинишича. 17 май куни вилоят ҳокими Улуғбек Қосимов Dongfeng Luizhou Моtor компанияси — Dongfeng Моtor Group шўба корхонасининг Синдао автомобиль тадқиқот институти директори ўринбосари Фу Хао бошчилигидаги делегациясини қабул қилди.
Томонлар лойиҳанинг техник-иқтисодий асосларини чуқур ўрганиш ва уни амалга ошириш имкониятларини муҳокама қилиш учун мутахассислар иштирокида кенгайтирилган икки томонлама музокаралар ўтказишга келишиб олди.
Вилоят ҳокимлиги томонидан эълон қилинган суратларга кўра, Хитой компанияси электр фургонлар, мини юк машиналари ва кўп мақсадли транспорт воситаларининг (МVP) бир нечта моделларини тақдим этган.
Май ойи бошида Шавкат Мирзиёев Хоразм вилояти Тупроққалъа туманида ҳозирда Damas ва Labo ишлаб чиқарилаётган заводда “бозорда катта талабга эга арзон” автомобиль ишлаб чиқариш йўлга қўйилишини маълум қилди. Лойиҳа 100 миллион доллар ҳисобига амалга оширилиб, унинг доирасида Евро-5 стандартидаги 7 ўринга мўлжалланган автомобиллар ишлаб чиқарилади.
Президент мутасаддиларга жорий йилда ҳамкорлар билан музокарани якунлаб, 2026 йилда йирик узелли йиғиш (SQD) усулида ишлаб чиқаришни бошлашни топширди. Шунингдек, 2027 йилда ишлаб чиқаришни тўлиқ циклга ўтказиш ҳамда маҳаллийлаштиришни 50 фоизга олиб чиқиш бўйича кўрсатма берилди.
“Ўзавтосаноат”нинг “Дарё”га маълум қилишича, янги модел мақсадли истеъмолчиларнинг истак ва эҳтиёжларини инобатга олган ҳолда танланади. Айни пайтда техник хусусиятларнинг маҳаллий фойдаланиш шароитларига мослиги, ишончлилиги ва қулайлиги бўйича потенциал автомобиль моделлари ўрганилмоқда.
UzAutoМоtors Chevrolet Damas ва Labo автомобилларини ишлаб чиқаришни тўхтатишни режалаштирмаяпти.
Изоҳ (0)