Иқтисодиёт ва молия вазирлиги ходимларидан Давлат мадҳиясини ёдлаб, видеога олишни талаб қилгани акс этган хат тарқалди.
Унда “Ўзбекистон Республикаси давлат мадҳияси тўғрисида”ги қонунда белгиланган талабларга амал қилган ҳолда барча тузилма раҳбарлари ва ходимларидан давлат мадҳиясини ёддан билиш ҳамда уни тўғри, руҳлантирувчи услубда ижро этиш талаб этилган.
Мазкур топшириқни ўз вақтида ва самарали бажарилишини назорат қилишга ҳар бир тузилма раҳбари шахсан масъул экани, шунингдек, ушбу топшириқни бажармаган ходимларнинг фаолиятини баҳолашда энг муҳим самарадорлик кўрсаткичларида ҳисобга олиниши маълум қилинган.
Бир ой ичида ҳар бир ходим томонидан давлат мадҳияси ижро этилган видеоёзув “эдо.ижро.уз” электрон дастурига юклангандан сўнг топшириқ бажарилган деб ҳисобланиши айтилган.
Бироқ вазирлик расмий саҳифаларида бу бўйича расмий муносабат билдирилмаган.
Маълумот учун, Ўзбекистон Давлат мадҳиясининг матни ва мусиқаси 1992 йил 10 декабрдаги “Ўзбекистон Республикасининг Давлат мадҳияси тўғрисида”ги қонуни билан тасдиқланган.
Ўзбекистон мадҳияси мамлакат суверенитетининг рамзидир. Давлат мадҳиясига зўр эҳтиром билан қараш Ўзбекистон фуқаросининг ватанпарварлик бурчидир.
Изоҳ (0)