АҚШ ва Хитой бир-бирининг товарлари учун ўзаро божларни 90 кунга пасайтиришга келишиб олди. Бу ҳақда Bloomberg агентлиги хабар берди.
Женевада икки давлатнинг қўшма баёноти эълон қилинди. АҚШ ва Хитой савдо кескинлигини юмшатиш, иқтисодиётдаги келишмовчиликларни ҳал қилиш учун қўшимча вақт белгилашга келишди.
Хитой импортининг катта қисмига нисбатан қўлланадиган 145 фоизлик АҚШ божлари, жумладан, фентанилга боғлиқ ставка ҳам 30 фоизгача пасайтирилади. Ўз навбатида, Хитойнинг Америка товарларига нисбатан жорий этган 125 фоизлик божхона тўловлари эса 10 фоизгача туширилади.
Икки томон иқтисодий ва савдо муносабатларини муҳокама қилишни давом эттириш учун махсус механизм яратишга келишиб олган. Бу музокараларга Хитой бош вазири ўринбосари Ҳе Lifeнг, АҚШ молия вазири Скотт Бессент ва АҚШ савдо вакили Жеймисон Грир раҳбарлик қилади.
Музокаралар навбатма-навбат Хитойда, АҚШда ёки томонлар келишган учинчи мамлакатда ўтказилиши мумкин. Зарурат туғилганда, томонлар иқтисодий ва савдо масалалари бўйича ишчи даражадаги маслаҳатлашувлар ўтказиши кутилмоқда.
Трампнинг савдо уруши
2 апрель куни АҚШ президенти Дональд Трамп барча давлатлар учун 10 фоизлик асосий тарифларни жорий қилди. Аммо божлар ҳар бир давлатнинг савдо балансига қараб ўзгарди. Хитой билан савдода йирик дефицит мавжудлиги боис АҚШ бу мамлакат учун тарифларни анча юқори даражага кўтариб, 34 фоизга етказди.
Бунга жавобан Пекин ҳам шунча миқдорда Америка товарларига божлар солди. Шундан сўнг Трамп агар Пекин жавоб чораларидан воз кечмаса, божларни 50 фоизгача ошириш билан таҳдид қилди. Шу сабабли божлар 104 фоизга ошди. Натижада Хитой Америка маҳсулотлари учун божларни 84 фоизга оширишини эълон қилди. Мазкур эълон ортидан Трамп Пекин учун тарифлар 125 фоизга чиқишини айтди, кейинчалик буни 145 фоизга оширди.
Хитой мазкур тарифларга жавобан ставкани 125 фоизга кўтарди. Хитой АҚШни “ўзаро божлар”ни бекор қилишга ва ўзининг нотўғри амалиётини тузатишга чақирди. ХХР раиси Си Цзиньпин ҳеч бир давлат “бож уруши”дан ютмаслигини қайд этди. Шундан сўнг иккала давлат савдо музокараларини бошлаганди.
Изоҳ (0)