Америкаликларнинг президент Дональд Трамп фаолиятини қўллаб-қувватлаши 42 фоизгача пасайди. Бу унинг Оқ уйга қайтганидан бери энг паст кўрсаткич ҳисобланади. Reuters бу ҳақда Ipsos компанияси билан ҳамкорликда ўтказилган тадқиқотга асосланиб маълум қилмоқда.
Сўровда қатнашганларнинг 42 фоизи Трампнинг давлат раҳбари сифатидаги фаолиятини маъқулласа, 53 фоизи унинг сиёсатини қўллаб-қувватламайди.
Ipsos’нинг олдинги сўрови натижаларига кўра, Трампни маъқуллаш даражаси 43 фоизни ташкил этган эди. Март ойининг иккинчи ярмида бу кўрсаткич 45 фоизга тенг бўлган.
Агентлик Трамп обрўйининг пасайишини, жумладан, унинг маъмурияти томонидан ҳаддан ташқари либерал деб ҳисобланган университетларга нисбатан таъқиб сиёсати билан боғлайди. Қайд этиш лозим, апрель ойи ўрталарида АҚШ таълим вазирлиги Гарвард университети учун 2,2 миллиард долларлик грантлар ва 60 миллион долларлик узоқ муддатли шартномаларни тўхтатиб қўйганини эълон қилган эди.
Сўровда иштирок этганларнинг 59 фоизи АҚШ халқаро майдонда ўз обрўйини йўқотаётганини таъкидлаган. Сўралганларнинг тахминан тўртдан уч қисми Трампнинг 2028 йилда учинчи муддатга сайланишга уринишига қарши.
Изоҳ (0)