Time томонидан эълон қилинган 2020 йилнинг энг нуфузли одамлари рўйхатидан Дональд Трамп, ирқчиликка қарши ҳаракат етакчилари ҳамда шифокорлар ва олимлар ўрин олди

АҚШнинг Time журнали 2020 йилнинг энг нуфузли 100 кишиси рўйхатини эълон қилди. Бу ҳақда Meduza хабар берди.

Қайд этилишича, Time 100 рейтинг эмас, рўйхатдаги иштирокчилар таъсир даражасига кўра тартибланмаган. Журнал уларни «Етакчилар», «Титанлар», «Новаторлар», «Санъат намоёндалари» ва «Белгилар» деб таснифлаган.

«Етакчилар» қаторидан АҚШ президенти Дональд Трамп, унинг 2020 йил ноябрь ойида бўлиб ўтадиган сайловдаги рақиби Жо Байден, Германия канцлери Ангела Меркель, Хитой раҳбари Си Цзиньпин ўрин олган.

Шундай қилиб, «Белгилар» тоифасига Нью-Йоркдан бўлган ҳамшира Эмми O’Салливан киритилди. У шаҳарда COVID-19 билан касалланиш бўйича биринчи ҳолат қайд этилган касалхонада ишлайди. O’Салливаннинг ўзи инфекцияни юқтириб олган, у тўрт кун давомида сунъий нафас олиш аппаратига уланган ва икки ҳафта ўтгач ўз ишига қайтган.

АҚШнинг Аллергия ва юқумли касалликлар миллий институти раҳбари Энтони Фаучи «Етакчилар» қаторига кирди. «Унинг далилларга асосланганлиги ва илм-фанга эътибор қаратганлиги уни кўпинча президент Дональд Трампга (COVID-19’га қарши кураш масаласида) қарши қўйди», — дея тушунтиради Time ўз танловини.

Мюнхенлик юқумли касалликлар бўйича мутахассис Камилла Роте коронавирус баъзан одамдан одамга белгиларсиз юқиши мумкинлигини аниқлаган ва у «Новаторлар» тоифасига киритилган.

Журнал рўйхатни тузишда одатда «тирикларга эътибор қаратади», аммо 2020 йилда бу рўйхатда аллақачон вафот этганлар жуда кўп. Масалан, ўлимида полициячилар айбланаётган бир неча киши, жумладан, миннеаполислик афроамерикалик Жорж Флойд.

Black Lives Matter ҳаракатининг асосчилари Алисиа Гарза, Опал Томети ва Патрис Каллорс «Белгилар» туркумига киритилган. Кўпчилик Жорж Флойд ўлдирилганидан кейин бу ҳаракат ҳақида эслади ёки биринчи марта эшитди.