Эрон ва АҚШ ўртасидаги можаро ҳамда АҚШнинг Ироқдаги ҳарбий базаларига берган зарбалари жаҳон олтин ва нефть бозорида сеизларли акс этди. Олтин 2013 йилдан буён қайд этилган энг юқори нархга чиқди, нефтнинг нархи ошмоқда. Бу ҳақда The Bell хабар берди.
Генерал Қосим Сулаймонийнинг АҚШ томонидан ўлдирилишига нисбатан Эроннинг берган жавоби ҳақида хабарлар инвесторларни қўрқитиб қўйди.
Мазкур хабар жаҳон фонд бозорида ҳам ўзининг салбий таъсирини кўрсатди. S&P 500 индекси 1,7 фоизга пасайди, Япониянинг Nikkei биржаси котировкасида 2,6 фоизли пасайиш кузатилди, Гонконгнинг Hang Seng биржасида эса пасайиш 1,6 фоизни ташкил қилди. Кўрсаткичлардаги ўзгаришлар Эрон ташқи ишлар вазирининг мамлакат урушни хоҳламаётгани ҳақидаги баёноти ва Дональд Трампнинг «ҳаммаси жойида» эканлиги ҳақида твитидан кейин бошланган.
Қайд этилишича, АҚШ ғазначилигининг 10 йиллик облигацияларининг даромадлилиги 1,7 фоизгача пасайган. Яқин Шарқда бўлиши мумкин бўлган кейинги низолар мазкур облигацияларнинг даромадлилигини 1,6 фоизгача пасайтириши мумкин.
Олтин 2013 йилдан буён ўзининг энг қиммат кўрсаткичига чиққан. Олтиннинг бир трой унсияси нархи 1600 доллардан ошган. Кейинроқ эса унинг нархи 1583 долларга тушган.
WTI маркали нефтнинг нархи 4,4 фоизга қимматлашган, Brent маркасидаги нефтнинг нархи савдолар чоғида 5 фоизга қимматлашиб, бир баррель учун 71,75 долларга етган, бироқ кейинчалик унинг нархи 68,82 долларгача пасайган. Fitch Rating халқаро рейтинг агентлигининг тахмин қилишича, низо чигаллашадиган бўлса, Brent нефтининг нархи 70—80 долларгача қимматлашиши мумкин.
Эрон ислом инқилоби муҳофизлари корпусининг «Ал-Қудс» махсус бўлинмаси генерали Қосим Сулаймоний 3 январь куни АҚШ ҳаво кучлари томонидан Бағдод аэропортига берилган авиаҳужум оқибатида ҳалок бўлган. Эрон ушбу жиноят учун АҚШдан аёвсиз қасос олишини билдирган. Теҳроннинг бу борадаги биринчи қадами 5 январь куни ядро келишувидан бутунлай чиқиш бўлди. Шунингдек, Эрон парламенти АҚШ ҳамда Пентагонни террорчилик ташкилотлари деб эълон қилиш ҳақидаги қонун лойиҳасини қабул қилган.
Изоҳ (0)