АҚШ Сенати давлат қарзининг рухсат этилган миқдорини вақтинча ошириш тўғрисидаги қонун лойиҳасини маъқуллади. Бу чора мамлакатга давлат мажбуриятлари бўйича назарий дефолт (тўлов мажбуриятларини бажармаслик) эҳтимолини четлаб ўтиш имконини беради.
50 нафар сенатор қонун лойиҳаси учун овоз берди. Қарз олишнинг рухсат этилган даражасини 480 миллиард долларга оширишга қарор қилинди, ҳозирда давлат қарзининг рухсат этилган ҳажми 28,4 триллион долларни ташкил этади. Молия вазирлигининг ҳисоб-китобларига кўра, бу 3 декабргача давлат харажатларини қоплаш имконини беради. Бу вақтгача демократлар ва республикачилар муаммонинг доимий тўлиқ ечимини ишлаб чиқиши керак.
Аввалроқ Молия вазирлиги агар давлат қарзининг рухсат этилган ҳажмига оид масала 18 октябрга қадар ҳал қилинмаса, мамлакат дефолт хавфи остида қолиши мумкинлиги ҳақида огоҳлантирганди, чунки у ўз мажбуриятларини бажариш учун захираларни тугатади. Энди қонун лойиҳаси кўриб чиқиш учун Вакиллар палатасига, кейин эса имзолаш учун президент Жо Байденга юборилади.
Овоз беришдан бир кун олдин Байден миллий қарз лимитини ошириш кераклигини эълон қилганди. «Қарз лимитини оширмаслик АҚШ Ғазначилик қимматли қоғозлари хавфсизлигига путур етказади; долларнинг жаҳон валютаси сифатида дунё таянадиган мақомига таҳдид солади; Американинг кредит рейтингини пасайтиради; оилалар учун фоиз ставкалари ошишига олиб келади. Гап ипотека, автокредит, кредит карталари ҳақида кетмоқда», — тушунтирди у.
Moody’s халқаро рейтинг агентлигининг етакчи иқтисодчиси Марк Занди дефолт юз берган тақдирда, бу коронавирус пандемиясидан кейин Америка иқтисодиётини тиклаш учун «ҳалокатли зарба» бўлишидан огоҳлантирди. «Таназзулни молиявий инқироз давридаги турғунлик билан солиштириш мумкин. Бу шуни англатадики, реал ялпи ички маҳсулот қарийб 4 фоизга пасаяди, 6 миллионга яқин иш ўринлари йўқолади ва ишсизлик даражаси деярли 9 фоизгача кўтарилади», — деди эксперт.
Шунингдек, унинг прогнозига кўра, бу акциялар қийматининг қарийб учдан бир қисмига пасайишига, ипотека кредитлари, истеъмол ва корпоратив кредитлар бўйича фоиз ставкаларининг кўтарилишига олиб келади. «Шунга қарамай, ставкалар ҳеч қачон аввалги қийматларига қайтмайди. АҚШ Ғазначилигининг қимматли қоғозлари хавф остида қолиши сабабли, америкаликларнинг келажак авлодлари юқори иқтисодий нарх тўлайди», — деб таъкидлайди Занди.
7 октябрь кунги Сенатда овоз беришдан олдин республикачилар ва демократлар ўртасида бир неча ҳафталик тортишувлар бўлиб ўтди. Қонунчилар охирги марта 6 октябрь, чоршанба куни ҳукумат қарзининг чегарасини ошириш бўйича овоз беришга ҳаракат қилди. Ўшанда овоз бериш республикачиларнинг инқирозни ҳал қилиш борасидаги янги режасига рози бўлмаган демократлар ташаббуси билан ўтказилмади.
Изоҳ (0)