Пробацияни амалга оширишга кўмаклашган шахслар рағбатлантирилиши мумкин, деб хабар бермоқда Адлия вазирлиги.
Президентнинг айрим ҳужжатларига ўзгартириш ва қўшимчалар киритилди. Унга кўра, Ички ишлар вазирига қуйидаги рағбатлантириш чораларини қўллаш ҳуқуқлари берилди:
- пробацияни амалга оширишга кўмаклашган давлат органларининг, муассасаларининг ва ташкилотларининг ходимларини, шунингдек, фуқароларнинг ўзини ўзи бошқариш органларини, нодавлат нотижорат ташкилотларни ҳамда фуқароларни рағбатлантириш;
- жамоат хавфсизлигини таъминлашда ўзининг муносиб ҳиссасини қўшган ички ишлар органлари ходимларини лавозим маошининг 1 бараваригача бўлган миқдорда бир марталик мукофот билан рағбатлантириш.
“Пробация” одатда жиноят содир этган шахсларнинг жазо ўташидан олдин ёки ўрнига қўйилган кузатув ва маслаҳатлар даврини англатади. Бу даврда, шахслар кўпинча жиноий ҳаракатларининг натижасида ҳам жамиятга қайтишларига ёрдам берадиган мутахассислар ёки ташкилотлар томонидан назорат қилинади.
Шунга кўра, “Пробацияни амалга оширишга ёрдам берганлар” деганда, пробация жараёнида ишловчи мутахассислар ёки ташкилотлар назарда тутилган бўлиши мумкин.
Ўзбекистонда пробация бўлинмалари ходимлари ваколати кенгайтирилиши айтилган эди. Маъмурий жавобгарлик тўғрисидаги кодекснинг 248-моддаси тўртинчи қисмига қўшимча ва ўзгартириш киритиш орқали ички ишлар органларининг 185-2 (совуқ қуролни ёки совуқ қурол сифатида фойдаланилиши мумкин бўлган ашёларни олиб юриш) ва 187-моддалари (жамоат жойларида алкоголь маҳсулотини истеъмол қилиш) бўйича пробация назоратидаги шахсларга нисбатан маъмурий ҳуқуқбузарликлар тўғрисида баённома тузиш ваколатини пробация хизматининг катта инспектори ва инспекторига бериш нормаси белгиланган.
Изоҳ (0)