Собиқ депутат, ижтимоий тармоқ фаоли Қобил Дусов қамоққа олинган бўлиши мумкинлиги, катта эҳтимол билан у пробация талабларини бузгани хабар берилганди. Олий суд ахборот хизмати раҳбари Азиз Абидовнинг ёзишича, Қобил Дусовга нисбатан қўлланилган озодликни чеклаш жазоси 11 ой 2 кунлик озодликдан маҳрум қилиш жазоси билан алмаштирилган.
Суд ҳумига кўра Жиноят кодексининг 48-1-моддасига (озодликни чеклаш) асосан Қ.Дусовга сутканинг муайян вақти, яъни кеч соат 21:00 дан эрталабки соат 07:00 га қадар яшаш жойидан чиқиш чекланиши ва унга қўшимча интернетдан фойдаланмаслик, оммавий ва бошқа тадбирлар ўтказишда иштирок этмаслик, ҳар ойда бир маротаба яшаш жойи бўйича ИИО ФМБ Пробация бўлимидан рўйхатдан ўтиб туриш ҳамда маҳкумларни назорат қилувчи органнинг розилигисиз яшаш жойини ўзгартирмаслик каби тақиқлар юкланиши белгиланган.
Яшнобод туман ИИО ФМБ Пробация бўлими томонидан судга киритилган тақдимномада К.Дусов ахлоқан тузалиш йўлига ўтмаганлиги, унинг чеклов ва тақиқларга риоя этмасдан жазони ўташдан қасддан бўйин товлаб келаётганлиги, бир неча маротаба у билан олиб борилган профилактик суҳбатлардан ўзига ижобий хулоса чиқармаётганлиги маълум қилинган. Шунингдек, уни жамиятдан ажратмаган ҳолда тарбиялаш имконияти йўқлиги, суд ҳукми ижросиз қолаётганлиги, шу сабабли Жиноят кодексининг 48-1-моддаси 6-банди ва Жиноят-ижроия кодексининг 44-4-моддаси (озодликни чеклаш тариқасидаги жазони ўташ тартиби ва шартларини бузганлик учун жавобгарлик) 3-қисми “а” бандига асосан ўталмай қолган 11 ой 2 кун озодликдан чеклаш жазосини шу муддатга озодликдан маҳрум қилиш жазосига алмаштириш сўралган, дейилади Олий суд ахборот хизмати раҳбари баёнотида.
Қайд этилишича, Қ.Дусов жазо ўташ қонун-қоидалари билан таништирилган ва Жиноят кодексининг 48-1-моддаси 6-қисми билан огоҳлантирилиб, бу ҳақида тилхатлар олинган.
Суд ҳукмида Дусовга белгиланган чеклов ва тақиқларга риоя этмаган тақдирда Жиноят кодексининг 48-1-моддаси 5- ва 6-қисми талаблари тушунтирилган, шунингдек, унга интернетдан фойдаланмаслик ҳақида қўшимча тақиқ юклатилган бўлишига қарамасдан 2025 йил 4 январь кунидан 11 январь кунига қадар “Кобул Дусов/Расмий канал” Telegram-каналида ҳар хил мазмундаги материаллар жойлаштириб келганлиги аниқланган. Ушбу ҳолат юзасидан Дусов 2025 йил 11 январь куни Яшнобод тумани ИИО ФМБ Пробация бўлимига чақиртирилиб, Жиноят-ижроия кодекснинг 44-4-моддаси 1-қисми билан огоҳлантириш тарзидаги интизомий жазо қўлланилган.
Дусовга 24 январь куни ИИВ ТҚД Киберхавфсизлик томонидан яна огоҳлантириш интизомий жазоси эълон қилинган бўлса-да ундан олдин ҳам ундан кейин ҳам интернетдан фаол фойдаланиб келганлиги аниқланган. Суд тақдимномани муҳокама қилиб, иш ҳужжатларини текшириб, тақдимномани қаноатлантиришни лозим топди. Шу тариқа Жиноят ишлари бўйича Яшнобод туман судининг жорий йил 24 январдаги ажримига мувофиқ тақдимнома қаноатлантирилиб, Жиноят ишлари бўйича Чилонзор туман судининг 2024 йил 22 ноябрдаги ҳукми билан маҳкум Дусовга нисбатан тайинланган ва ўталмай қолган 11 ой 2 кун озодликни чеклаш жазоси шу муддатга озодликдан маҳрум қилиш жазосига алмаштирилди. Жазони манзил-колонияларда ўташ белгиланди, дейди Азиз Абидов.
Изоҳ (0)