Блогер Фозилхўжа Орифхўжаев шартли равишда муддатидан аввал қамоқдан озод қилинди. Бу ҳақда Эзгулик инсон ҳуқуқлари жамияти раҳбари Абдураҳмон Ташанов маълум қилди.
Фозилхўжа Орифхўжаев 2021 йилнинг июнида Тошкентнинг Олмазор туманида жойлашган жоме масжидида Аброр Мухтор Али билан келиб чиққан низодан сўнг майда безорилик содир этишда айбли деб топиб, унга 15 сутка маъмурий қамоқ жазоси тайинлаганди.
Кейинроқ пойтахт ИИББ ахборот хизмати текширув жараёнида ҳуқуқни муҳофаза қилувчи органларга Фозилхўжанинг телефонида шубҳали диний мазмундаги материаллар борлиги ва уларни бошқа шахсларга намойиш қилгани ҳақида хабар келиб тушганини маълум қилганди. Дин ишлари бўйича қўмитанинг хулосасига кўра, блогернинг Facebook’даги профилига жойлаштирилган айрим материаллар диний ақидапарастликни тарғиб қилувчи материаллар деб топилган.
2022 йилнинг январида у Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми “г” бандида назарда тутилган жиноятни содир этганликда айбли деб топилиб, 7 йил-у 6 ой муддатга озодликдан маҳрум қилиш жазоси тайинланганди.
2022 йилнинг май ойида Олий Мажлиснинг инсон ҳуқуқлари бўйича вакили қошидаги Миллий превентив механизмлар бўйича ишчи гуруҳи Навоий вилоятидаги жазони ижро этиш муассасаларига жазо муддатини ўтаётган Фозилхўжа Орифхўжаев ҳолидан хабар олганди. Ўшанда у қамоқхона шароитидан шикояти йўқлигини, аммо суд ҳукмидан норози эканини айтганди.
Блогернинг яқинларининг “Газета.уз”га маълум қилишича, унинг 7,5 йил муддатга озодликдан маҳрум қилиш жазоси маошининг бир қисми давлат фойдасига ушлаб қолинган ҳолда шартли жазо билан алмаштирилган. У пробация хизмати ходимлари назоратида бўлади.
Изоҳ (0)