Tesla ва SpaceX асосчиси Илон Маск ўтган йили Украина Қуролли кучлари Россия флотига ҳужум уюштирмоқчи бўлганида, нима учун Қрим соҳиллари яқинида Starlink сунъий йўлдошларини ёқиб бермаганини тушунтиришда давом этмоқда.
Аll-in Summit технология конференциясида Маск Россия томонидан аннексия қилинган Қримга санкциялар киритилгани туфайли у ерда Starlink’ни ёқа олмаганини айтди. Тадбиркорнинг сўзларига кўра, ёқиш учун АҚШ расмийларидан рухсат талаб қилинган ва гўёки уни олишга вақт бўлмаган, чунки Украина томони “ярим тунда” илтимос билан чиққан.
“Агар менда АҚШ президентининг тизимни ёқиш бўйича тўғридан тўғри буйруғи бўлганида, буни қилган бўлардим, аммо бундай буйруқ келмади”, — деди Маск
2022 йилда Украина ҳарбийларининг Қримдаги Россия ҳарбий-денгиз флотига ҳужум режалари Starlink туфайли барбод бўлгани Маскнинг Уолтер Айзексон томонидан ёзилган таржимаи ҳолидан маълум бўлди. Китобда айтилишича, ҳужум олдидан Маск сунъий йўлдошларни ўчириб қўйган. Бироқ тадбиркорнинг ўзи Starlink Қримда шундоқ ҳам ишламаслигини, украиналик ҳарбийлар ундан сунъий йўлдош алоқасини ёқиб беришни сўраганини таъкидлади.
Айзексон китобни тайёрлаш чоғида Маскни нотўғри тушунганини тан олди. 12 сентябрь куни Fox News’нинг America’s Newsroom дастурида ёзувчининг тушунтиришича, Маск украиналик ҳарбийларнинг Starlink’ни ёқиш илтимоси билан боғлиқ вазиятни тасвирлаб: “Биз (тизимга уланишни) таъминламадик”, — деган. Айзексоннинг сўзларига кўра, у ушбу гапни тизим ёқилмади деб эмас, балки ўчириб қўйилди, деб тушунган.
Айзексоннинг китобида айтилишича, Украина ҳарбий-денгиз кучларининг интернетсиз қолган дронлари Қримдаги Россия флотига ҳужум қила олмаган ва қирғоққа чиқиб қолган. Китоб муаллифига кўра, Маск ўшанда Россия расмийлари ҳужумга жавобан ядро қуролидан фойдаланиши мумкинлигидан қўрқиб, украиналик ҳарбийларга ёрдам беришдан бош тортган.
Маскнинг таржимаи ҳолидаги ушбу эпизод қизғин муҳокамаларга сабаб бўлди, жумладан, Қўшма Штатларда баъзи сиёсатчилар бизнесменни тергов қилишга чақирди.
Изоҳ (0)