Tesla ва SpaceX асосчиси Илон Маск 2022 йилда ўз ходимларига Россия ҳарбий-денгиз флотига Украина Қуролли кучлари ҳужумининг олдини олиш учун аннексия қилинган Қрим қирғоқлари яқинида Starlink сунъий йўлдошларини ўчириб қўйиш ҳақида яширинча топшириқ берган. Бу ҳақда CNN Маскнинг Уолтер Айзексон томонидан ёзилган таржимаи ҳолига таяниб, хабар берди.
CNN Украина ҳужуми ўтган йили айнан қачон уюштирилиши керак бўлгани ҳақида аниқ маълумот бермаган, бироқ Айзексоннинг китобида айтилишича, портловчи моддалар билан тўлдирилган денгиз дронлари Россия флотига яқинлашиб келаётган пайтда Қримдаги Starlink ўчириб қўйилган.
Таржимаи ҳолдан маълум бўлишича, Украина расмийлари Маскни сунъий йўлдош ишини тиклашга кўндиришга уринган, аммо у Киев ушбу ҳужум билан “ҳаддан ошиб кетаётганини” айтиб, рад жавобини берган. Натижада алоқани йўқотган дронлар қирғоққа чиқиб кетган, деб ёзади CNN.
Айзексоннинг сўзларига кўра, Маск Россия ушбу ҳужумга ядро қуроли билан жавоб қайтариши мумкинлигидан қўрқиб, шундай қарор қилган. Китобда айтилишича, тадбиркордаги бу қўрқувга “Россиянинг юқори мартабали амалдорлари” билан бўлган суҳбатлар сабаб бўлган.
“Starlink урушларда жанг қилиш учун мўлжалланмаган. У одамлар Netflix томоша қилиши, дам олиши, мактабда интернетга уланиши ва савобли тинч ишларни қилиши учун яратилган”, — деган Илон Маск китоб учун Уолтер Айзексон билан суҳбатда.
Кейинроқ Маскнинг ўзи CNN мақоласига жавоб сифатида Twitter(Х)га пост жойлади. Унда айтилишича, тадбиркор Starlink’ни ўчиришни буюрмаган, чунки унинг сўзларига кўра, тизим шундоқ ҳам Қримда ишламайди. Маскнинг тушунтиришича, у украиналик ҳарбийларнинг Starlink’ни ёқиш ҳақидаги илтимосини рад этган: улар тизим ёрдамида Россия флотига ҳужум учун Севастополга дронлар учирмоқчи бўлган.
Маск буни SpaceX компанияси “уруш ва можаронинг авж олишида бевосита иштирокчига айланиб қолиши мумкинлиги” билан изоҳлади.
Россиянинг кенг кўламли босқини бошланганидан кўп ўтмай Украинада Starlink тармоғи жойлаштирилди. 2023 йил февралида SpaceX Украина ҳарбийларига Starlink’дан ҳужумкор мақсадларда, жумладан, дронларни бошқаришда фойдаланишни тақиқлади. Июль ойида The New York Times газетаси “хабардор” одамларга таяниб, SpaceX уруш зонасида сунъий йўлдошларни чеклаётгани ҳақида хабар берди.
Изоҳ (0)