Америкалик миллиардер Илон Маскнинг Starlink сунъий йўлдошлари ишдан чиққанидан кейин Ернинг озон қатламини емириши мумкин. Бу ҳақда Business Insider хабар берди.
Жанубий Калифорния университетининг Астронавтика муҳандислиги бўлими олимлари паст орбитали интернет сунъий йўлдошларининг кўпайиши атмосферада зарарли кимёвий реакцияларга олиб келиши мумкинлиги ҳақида огоҳлантирди. Ҳозирда ернинг пастки орбитасида 8000 дан ортиқ интернет сунъий йўлдошлари мавжуд, улардан 6000 га яқини Starlink’ка тегишлидир. Уларнинг бари катта миқдордаги алюминийдан тайёрланган ва қисқа, тахминан беш йил хизмат қилиши мумкин.
Олимларнинг таъкидлашича, сунъий йўлдошлар Ер атмосферасига тушиб, ёнганида алюминий оксиди ҳосил бўлади ва бу озон учун жуда ҳалокатли кимёвий реакцияга сабаб бўлади.
2016 ва 2022 йиллар оралиғида оксидларнинг мавжудлиги тахминан саккиз баравар кўпайган ва ҳозирги сунъий йўлдошни учириш режалари билан унинг сони янада ортиши мумкин.
Бундан ҳам ёмони, оксидларнинг таъсири ўнлаб йиллар давомида сақланиши мумкин, чунки унинг заррачалари пастга тушишда давом этади.
Маълумот учун
- Олимлар кузатувига кўра, 2022 йил сунъий йўлдошларнинг қулаши натижасида атмосферага 18,7 тонна алюминий оксиди нанозаррачалари чиқарилган.
- Режалаштирилган сунъий йўлдошлар учирилиши оқибатида бу кўрсаткич йилига 397 тоннагача ошиши ва “озон қатламининг сезиларли даражада емирилиши”га олиб келиши мумкин.
Изоҳ (0)