АҚШ Яқин Шарққа ядровий сувости кемасини юборади. Бу ҳақда АҚШ Мудофаа вазирлиги тарқатган баёнотга асосланиб, Reuters нашри маълум қилди.
Манбада айтилишича, АҚШ мудофаа вазири Ллойд Остин Яқин Шарққа бошқариладиган ядровий ракетали сувости кемасини жойлаштиришни буюрган. Ушбу маълумотни Пентагоннинг кўплаб манбалари тасдиқлаган.
АҚШ ҳукуматининг ушбу қарори Исроил ва Эрон ўртасидаги кескинлик кучайиши фонида қабул қилинган. Вашингтон расмийлари қирувчи самолётлар ва қуруқлик қўшинларидан ташқари сувости кемалари ҳам Исроил мудофаасида қатнашиши керак деган хулосага келган.
Ғарб коалицияси ҲАМАС ва “Ҳизбуллоҳ”нинг юқори мартабали аъзолари ўлдирилганидан кейин Эрон ҳужуми содир бўлишига тайёрланмоқда. Яқин Шарқдаги бир қанча айғоқчилик агентликлари ҳужум 15 августгача содир бўлиши айтган.
АҚШ ҳарбийлари тарқатган хабарга кўра, ядровий сувости кемаси USS Georgia июль ойидаёқ Ўрта Ер денгизига кириб борган. Эндиликда у Исроил соҳилларига олиб борилади.
Ллойд Остин, шунингдек, “Аврам Линкольн” тезкор ҳужум гуруҳига ҳам Яқин Шарққа жойлашишни буюрган. Ушбу бўлинмани баҳсли минтақага юборишдан мақсад ҳозирча аниқ эмас.
“Котиб Остин Қўшма Штатларнинг Исроилни ҳимоя қилиш учун барча мумкин бўлган қадамни ташлаш мажбуриятини яна бир бор таъкидлади ва минтақавий тарангликнинг кучайиши муносабати билан АҚШ ҳарбий кучлари позицияси ва имкониятларини Яқин Шарқда кучайтираётганини таъкидлади”, дейилади Пентагон тарқатган хабарда.
Олдинроқ АҚШ Исроилга қирувчи самолётлар эскадронини, ҳарбий кемалар эсминецини ҳамда кўплаб оғир қуролларни жойлаштирган эди. Вашингтон фақат Исроилга ҳужум бўлган тақдирдагина бу қуроллардан фойдаланиши айтилган.
Изоҳ (0)