Кения бўйлаб президент Уилям Руто ҳукуматига қарши норозилик намойишларида 16 киши ҳалок бўлиб, 400 дан ортиқ киши жароҳатланди. Бу ҳақда BBC хабар берди.
Найроби ва бошқа шаҳарларда полиция ва намойишчилар ўртасида тўқнашувлар бўлиб ўтган. 2024 йили ҳам мамлакатда ҳукуматга қарши норозилик юз берган эди. Намойишчиларнинг кўпчилиги “Руто кетиши керак” дея даъво қилган. Улар ҳукуматга тинч қаршилик кўрсатиш рамзи сифатида дарахт шохларини силкитган. Ҳукумат намойишларни телевидение ва радио орқали жонли ёритишни тақиқлаган. Кейинроқ, бу қарор Найробидаги Олий суд томонидан бекор қилинган.
Руто намойишчиларни тинчлик ва барқарорликка таҳдид солмасликка чақирган. Оломон унинг расмий қароргоҳига бостириб кирмоқчи бўлганда, улар полиция томонидан тўхтатиб қолинган. Шундан сўнг, президент расмий қароргоҳига ташрифини камайтирган.
“Норозиликлар Кенияда ҳукм сураётган тинчликни бузмаслиги лозим. Ишлар чаппасига кетганда бошқа борадиган жойимиз йўқ. Мамлакатимизни хавфсиз сақлаш бизнинг вазифамиз”, деди президент.
Полиция президент қароргоҳи ва парламентга олиб борадиган йўлларни ёпиш учун баррикадалар ва устара симларидан фойдаланган. Расмийлар 25 июнь кунги норозилик намойишларида қурбонлар сонини ҳали маълум қилмаган. Бироқ Amnesty Kenya — Инсон ҳуқуқлари ташкилоти қурбонлар сони 16 нафарга етганини айтмоқда.
Кения тиббиёт ассоциацияси, Кения ҳуқуқ жамияти ва полиция ислоҳотлари бўйича ишчи гуруҳ қурбонлар сонини турлича баҳолаган. Уларга кўра, камида 8 нафар намойишчи ҳалок бўлган, 400 нафар ярадорнинг 83 нафари “махсус даволаниш”га муҳтож.
Улардан 8 нафари ўқотар қуролдан яраланган. Жабрланганлар орасида 3 нафар полициячи ҳам борлиги айтилган.
Намойишчилардан бири Амина Муде BBC’га интервьюсида намойишга қўшилгани сабабини айтган.
“Мен мамлакат тўғри йўлда кетмаётганини ҳис қиляпман, айниқса таълимда муаммолар кўп. Менимча, мамлакат ва раҳбарият бизни тинглайдиган вақт аллақачон келган”, деган у.
Изоҳ (0)