Кенияда 400 дан ортиқ фуқаро ўлимида билвосита айбдор бўлган диний секта раҳбари ҳибсга олинди. Бу ҳақда Al Jazeera нашри хабар берди.
Манбада айтилишича, диний гуруҳ бошлиғи Пол Маккензи қотиллик айби билан ҳибсга олинган. У айни пайтда мамлакат шарқидаги Момбаса судига олиб келинган ҳамда судгача тергов қилиш учун терговчига топширилган.
Пол Маккензи ҳозирда 400 киши ўлимида айбдор ҳисобланмоқда. “Диний раҳнамо”га болаларни қийнаш, зўравонлик ва терроризмга алоқадорлик ҳолатлари бўйича ҳам айблов эълон қилинган.
Манбага кўра, “Хушхабар” черкови етакчиси Пол Маккензи апрель ойида ўзининг юзлаб шогирдларига очликда “маърифат”га эришишни буюрган. Бунинг ортидан узоқ вақт очлик сақлаган фуқаролар орасида ўлим ҳолатлари юз бера бошлаган.
Ҳалок бўлганлар сони 400 дан ортиб кетиши эса ҳукуматни жиддий чоралар кўришга ундаган. Полиция аралашуви билан черков фаолияти тўхтатилган ва секта аъзолари ҳибсга олинган.
Пол Маккензи айни дамда фуқароларни ўз жонига қасд қилишга ундашда айбланмоқда. Унинг шогирдларига берган кўрсатмалари айблов эълон қилишга тўла имкон беради.
Момбаса судида жиноятга алоқадор 90 дан ортиқ бошқа шахсларнинг ҳам ишлари кўрилган. Уларга раҳбарлик қилган Пол Маккензи судга қадар ўтган барча терговларда ўзига қўйилган айбловларни рад этган.
Юз берган даҳшатли воқеа Кения ҳукуматини чекка ҳудудлардаги конфессиялар устидан назоратни кучайтиришга ундаган. Кения Сенати ва давлат томонидан молиялаштириладиган инсон ҳуқуқларини назорат қилувчи ташкилотларнинг алоҳида ҳисоботларида диний гуруҳлар фаолиятини тартибга солиш талаб қилинган.
Ҳозирча президент Уилям Руто ўлим ҳолатларини текшириш ва диний идораларни тартибга солувчи қоидаларни кўриб чиқиш учун комиссия тузган. Ҳалок бўлганлар нима сабабдан ва қай тарзда вафот этганини батафсил аниқлаш учун ишлар давом эттирилмоқда.
Изоҳ (0)