Покистонлик журналист Аршад Шариф Кенияда отиб ўлдирилди. Буни марҳумнинг рафиқаси тасдиқлади, деб хабар бермоқда The Siasat Daily.
Покистон Ташқи ишлар вазирлиги матбуот котиби Асим Ифтихорнинг айтишича, Покистоннинг Кениядаги Олий комиссияси мамлакат ҳукуматидан маълумот олмоқда.
Журналистнинг вафоти муносабати билан сиёсатчилар ва ҳамкасблари ҳамдардлик билдирди. Покистон президент Ориф Алви Шарифнинг ўлимини журналистика ва Покистон учун йўқотиш деб атади.
«Аршад Шариф оддий ҳамкасб ёки биродар эмас. Мен унданда олижаноб одамни билмайман. Уни отиб ўлдиришди. Жуда ёш пайти, ўта шафқатсизлик билан», — деб ёзди Hum News бошловчиси Меҳер Бохари Twitter’да.
Журналистлар Камран Хон ва Шаҳбоз Рана Шарифнинг ўлдирилиши бўйича тергов ўтказишга чақирди, деб хабар бермоқда Dawn news.
2022 йилнинг бошида полиция Шариф, АРЙ Digital Network телеканали президенти ва бош директори Салмон Иқбол, янгиликлар ва долзарб масалалар бўлими бошлиғи Аммад Юсаф, бошловчи Хавар Гумман ва продюсерни сиёсатчи Шаҳбаз Гиллнинг мунозарали интервьюси туфайли фитна учун жавобгарликка тортган эди.
Бир кун ўтиб, Ички ишлар вазирлиги телеканалнинг эътироз йўқлиги тўғрисидаги гувоҳномасини «агентликларнинг негатив хабарлари» сабаб бекор қилди, кейинчалик гувоҳнома Олий суд қарори билан бекор қилинди.
Шундан кейин Шариф мамлакатни тарк этган, деб хабар берди Dawn news. Кейинчалик АРЙ тармоғи Шариф билан «йўллари айро кетгани»ни эълон қилди.
Изоҳ (0)