Кения полицияси 15 июль куни 42 нафар аёлни ўлдирган серияли қотилни ҳибсга олган. Бу ҳақда полиция матбуот хизмати тарқатган хабарга асосланиб, CNN нашри хабар берди.
33 ёшли Коллинс Жумаиси Халуша душанба куни Кения пойтахти Найробидан шарқда жойлашган Совето шаҳрида ҳибсга олинган. У Евро-2024 футбол мусобақаси ўйинини томоша қилиш учун маҳаллий клублардан бирига борганда ҳибсга олинган.
Кениянинг жиноий тергов бўйича идораси директори Муҳаммад Амин суриштирув жараёни ҳақида маълумот берган. Унга кўра, Коллинс Жумаиси 42 нафар аёлни ўлдирганини тан олган.
“Сўроқ пайтида гумонланувчи 2022 йилдан 2024 йил 11 июлигача бўлган даврда 42 нафар аёлни алдаб уйига олиб келганини, сўнгра уларни ўлдириб, бурдаланган жасадларини йўқ қилгани ва ахлатхоналарга ташаб кетганини тан олди”, — деган Муҳаммад Амин.
Полиция бош инспектори вазифасини бажарувчи Дуглас Канжа ўз баёнотида ҳозиргача ўлдирилган аёллардан фақат 9 тасининг танаси қолдиқлари топилганини айтган. Улар экспертизага топширилгани ва таҳлил натижалари кутилаётгани билдирилган. Яна 33 та жасад номаълумлигича қолмоқда.
Коллинс Жумаиси Халуша ўз жиноятларини асосан ижарадаги уйида содир этгани аниқланган. Уй омборхонасидан жасад солинган қоп ва бошқа ашёвий далиллар ҳам топилган.
Полиция берган маълумотга кўра, серияли қотилнинг илк қурбони унинг рафиқаси бўлган. Қотил рафиқасини бўғиб ўлдирган ва танасини қисмларга бўлиб, шаҳар атрофидаги ахлатхонага ташлаб кетган.
Дастлабки олтита жасад 12 июль куни Найробининг Мукуру ва Нженга ҳудудларида топилган. Кения полициясининг таъкидлашича, жасадлар сув ва ахлат билан тўлдирилган собиқ қурилиш майдони ҳудудида аниқланган.
Коллинс Жумаиси Халуша қурбонларни нега ўлдирганлиги ҳали тўлиқ аниқланмаган. Расмийлар уни руҳий носоғлом деб тахмин қилишган. Унинг саломатлик таҳлиллари ҳали аниқ бўлмагани боис суд ҳам жазо тайинлашни кечиктириши хабар қилинган.
Серияли қотилнинг икки йил давомида ҳеч қандай тўсиққа учрамасдан жиноят содир этиши тинч аҳоли орасида хавотирларни кучайтирган. Бир гуруҳ фуқаролар аёллар ўлими ҳолатлари кўпайиши ортидан кениялик аёлларни ҳимоя қилиш тизимини кучайтиришга чақирган.
“Ўша аёллар қотилликда ўлдирилган, энди навбатдаги аёл ким бўлади? 42 кишини ўлдирган одам мамлакатда эркин ҳаракатланиб юрганлиги жуда ачинарли. Аёлларни ҳимоя қилиш керак ва улар ҳам инсон эканлигини инобатга олиш керак”, — деган қонуншунос Леа Санкаире Сопиато қотилликдан сўнг ташкил этилган матбуот брифингида.
Фаол фуқаролар мамлакат бўйлаб аёлларга қарши зўравонликни олдини олиш учун гендер полицияси тизимини қайта тиклашга чақирган.
Изоҳ (0)