Нампула провинцияси яқинидаги оролга етиб бормоқчи бўлган балиқчи кема чўкиб кетиши оқибатида 90 дан ортиқ одам ҳалок бўлди. Бу ҳақда тегишли манбаларга таяниб, NDTV хабар берди.
Нампула провинцияси давлат котиби Жейми Нето қўлда ясалган кема одамларни ташиш учун мўлжалланмаганини таъкидлаган. У кемада 130 нафарга яқин одам бўлгани ва у Мозамбик қирғоқлари яқинидаги кичик оролга йўл олганини айтган.
Қутқарувчилар беш нафар тирик қолганларни топган. Қидирув-қутқарув операцияси давом этмоқда, бироқ об-ҳаво шароити туфайли у мураккаблашмоқда. Нампула провинцияси давлат котиби ҳалок бўлганлар орасида кўплаб болалар борлигини айтган. Қурбонлар сони ҳозирча аниқ эмас, воқеа жойида тергов гуруҳи ишламоқда. Кема ҳалокати сабаблари аниқланмоқда.
Нетонинг сўзларига кўра, одамлар вабо эпидемияси ҳақидаги нотўғри маълумотлардан ваҳимага тушиб, мамлакатни тарк этишга уринган. Мозамбикда 2023 йил октябрь ойидан бери деярли 15,000 касаллик ва 32 вабодан ўлиш ҳолати қайд этилган.
Нампула энг кўп зарар кўрган минтақа бўлиб, барча ҳалокатли ҳолатларнинг учдан бир қисми мазкур ҳудудга тўғри келади.
Изоҳ (0)