Мозамбик қирғоғида Boeing 777 йўловчи самолётининг бўлаги топилди. CNN телеканалига асосланиб Meduza’нинг ёзишича, бўлак Malaysia Airlines компаниясининг 2014 йил мартида сирли равишда ғойиб бўлган самолёти қолдиғи бўлиши мумкинлиги тахмин қилинмоқда.
Топилган бўлак самолёт стабилизаторига оиддир. Топилма текшириш учун Малайзияга юборилди.
Бўлакнинг йўқолган самолётга тегишли экани ҳозирча тасдиқлангани йўқ. Malaysia Airlines ва Boeing компаниялари мазкур ахборот юзасидан изоҳ беришдан бош тортган.
Эслатиб ўтамиз, бир муддат илгари Франциянинг Ҳинд океанидаги Реюньон оролидан самолёт қанотининг парчаси топилган ва мутахассислар у Boeing 777 самолётига тегишли эканлигига ишонч билдирган эди.