Telegram асосчиси Павел Дуров мессенжерда шахсий маълумотларни рухсатсиз тарқатиш (доксинг) ва товламачилик билан шуғулланувчи каналлар блокланишини маълум қилди. Бу ҳақда Тасс нашри хабар берди.
Маълум қилинишича, 20 кун олдин берилган огоҳлантиришидан сўнг фойдаланувчилардан юзлаб шикоятлар келиб тушган.
“20 кун аввал жойлаган постимдан сўнг фойдаланувчилар бизга фирибгарлик ва шантаж ҳақида юзлаб хабарлар юборди. Уларга асосланган ҳолда, шу ҳафта кўплаб доксинг ва товламачилик билан шуғулланувчи каналларини блоклаймиз. Бизда канал администраторлари туҳматли постларни жойлаб, кейин пул эвазига уларни ўчириб ташлагани ҳақида инкор этиб бўлмас далиллар бор”, дейилади Павел Дуров баёнотида.
Унинг қўшимча қилишича, баъзи каналлар ҳатто “ҳимоя блоклари” — жабрланувчилар нишонга тушмаслик учун тўлаши керак бўлган тўловларни сотиш билан ҳам қўлга тушган. Дуров бундай каналлар клонларини яратишнинг ҳам фойдаси йўқлигини айтиб, улар ҳам барибир блокланишини таъкидламоқда.
“Telegram доксинг ёки товламачилик қиладиган жой эмас”, деган у.
Изоҳ (0)