Америкалик хонанда Мадонна Instagram’да эълон қилган мурожаатида понтификни Ғазога боришга даъват қилди, деб ёзади CNN нашри.
“Папа ҳазратлари, илтимос, Ғазога кетинг ва ўз нур-у умидингизни болаларга олиб боринг, токи кеч бўлмасин. Она сифатида уларнинг азобини кўришга ортиқ чидай олмайман. Ахир, дунёдаги болаларнинг бари ҳаммамизга тегишли. Айнан сиз киришига ҳеч ким тўсқинлик қила олмайдиган ягона одамсиз!”
Бундан аввал Мадонна ўғли Рокконинг туғилган куни муносабати билан ёзилган постда ҳам унга бера оладиган энг яхши совға “Ғазода урушда қолган бегуноҳ болаларни қутқариш учун қўлдан келганча ёрдам беришни сўраш” эканини айтган эди.
Рим Папаси май ойида ушбу лавозимга сайланганидан бери Ғазодаги урушни кескин танқид қилиб келади ва Исроил бомбардимони остида қолган фаластинлик тинч аҳолининг аҳволи ҳақида қайғурганини билдиради. Жорий йил июль ойида у шундай деганди:
“Мен Ғазодаги оғир гуманитар вазиятни катта хавотир билан кузатяпман. Тинч аҳолининг очликдан азият чекаётгани, зўравонлик ва ўлим хавфи остида қолаётгани мени ташвишга солмоқда”.
UNICEF маълумотига кўра, 2023 йил октябрида уруш бошланганидан бери Ғазода 18 мингдан ортиқ бола ҳалок бўлган. Ўтган ҳафтада ташкилот ҳар куни ўртача 28 нафар бола ўлдириб кетилаётганини маълум қилган.
ЖССТ бош директори Тедрос Адҳаном Гебреесус душанба куни Мадоннанинг постига жавобан унинг “ҳамдардлиги, бирдамлиги ва болалар учун ғамхўрликка чақираётгани” учун миннатдорлик билдирди.
Фаластин соғлиқни сақлаш вазирлиги маълумотига кўра, уруш бошланганидан бери камида 222 киши, жумладан 101 нафар бола очликдан нобуд бўлган. Исроил эса анклавга келадиган гуманитар ва тиббий ёрдам ҳамда турли ходимлар киришини қатъий назорат қилади. Шу сабабли Ғазодаги очарчилик муаммоси янада чуқурлашди, озиб кетган болаларнинг суратлари бутун дунёда хавотир уйғотди.
“Бу бегуноҳ болаларни қутқариш учун гуманитар эшикларни тўлиқ очишимиз керак. Вақтимиз жуда оз. Илтимос, бораман, деб айтинг”, дея мурожаат қилди Мадонна Рим папасига.
Исроил бош вазири Бенямин Нетаньяху ҳукумати папага анклавга киришга рухсат бериш ёки бермаслик масаласи эса номаълумлигича қолмоқда.
Изоҳ (0)