Европа тикланиш ва тараққиёт банки Ўзбекистон бўйлаб 110 та суғориш насос станциясини модернизация қилиш учун 250 миллион долларгача бўлган суверен кредит ажратади. Бу ҳақда Инвестициялар, саноат ва савдо вазирлиги матбуот хизмати хабар берди.
Тошкент халқаро инвестиция форуми доирасида бу борада тегишли битим имзоланди. Суверен кредит давлат томонидан олинган қарз маблағи бўлиб, бу қарз бўйича масъулият бевосита давлат зиммасида бўлади.
Лойиҳада 10 та ҳудуд қамраб олинади ва у Ўзбекистон суғориш тизимини модернизация қилиш бўйича Миллий дастур ижросига кўмаклашади. Натижада йилига 251 минг мегаватт соат электр энергияси тежалади ва атмосфера ҳавосига чиқариладиган карбонат ангидрид миқдори 117 минг тоннадан ортиқ камаяди. Шунингдек, лойиҳа доирасида насос станцияларининг томларига қуёш панеллари ўрнатилиши каби қўшимча инфратузилма ҳам янгиланади.
Ҳозирги кунда ЕТТБнинг Ўзбекистондаги инвестициявий портфели 5,6 миллиард евро қийматидаги 181 та лойиҳани ўз ичига олади. Маблағларнинг асосий қисми хусусий секторни ривожлантиришга йўналтирилган. Ўзбекистон беш йилдирки, Марказий Осиёда ЕТТБ инвестицияларининг энг йирик манзили бўлиб қолмоқда.
Шавкат Мирзиёев 11 июнь куни Хорижий инвесторлар кенгашининг учинчи мажлиси арафасида ЕТТБ президенти билан шериклик масалаларини муҳокама қилганди. Давлат раҳбари ҳамкорлик натижадорлигини ошириш муҳимлигини таъкидлаб, унинг асосий устувор йўналишларини кўрсатиб ўтганди. Улар қаторида сув таъминоти тизимини технологик жиҳатдан модернизация қилиш ҳам бор эди.
Ўзбекистонда 4,3 миллион гектар суғориладиган майдон бўлиб, шунинг 60 фоизи насослар ёрдамида суғорилади. Президент томонидан сув хўжалигида “2025 йил – “Насослар самарадорлигини ошириш йили” деб белгиланган. Бугунги кунда қишлоқ хўжалиги экин майдонларини суғориш ҳамда иқтисодиётнинг бошқа тармоқларини сув билан таъминлаш учун 1 700 га яқин насос станциялардан фойдаланилади. Уларни ишлатиш ва белгиланган сув миқдорларини чиқариш учун бир йилда 7 миллиард киловатт соат электр энергияси талаб этилади.
Изоҳ (0)