Шавкат Мирзиёев Италия президенти Сержо Маттарелланинг таклифига биноан 7—9 июнь кунлари расмий ташриф билан ушбу мамлакатда бўлади. Бу ҳақда Президент матбуот хизмати хабар берди.
Қайд этилишича, олий даражадаги учрашувлар Рим шаҳрида бўлиб ўтади. Давлат раҳбари Италия президенти Сержо Маттарелла ва бош вазир Жоржа Мелони билан музокаралар ўтказади.
Ўзбекистон билан Италия ўртасидаги кўп қиррали муносабатларни ва устувор йўналишлардаги амалий ҳамкорликни янада ривожлантиришнинг долзарб масалалари кўриб чиқилади. Халқаро кун тартиби юзасидан фикр алмашилади.
Бундан ташқари, Ўзбекистон етакчиси бош қароргоҳи Италия пойтахтида жойлашган Бирлашган Миллатлар Озиқ-овқат ва қишлоқ хўжалиги ташкилоти бош директори Сюй Дунюй билан учрашув ўтказади. Озиқ-овқат хавфсизлигини таъминлаш соҳасидаги ҳамкорликнинг муҳим жиҳатлари муҳокама қилиниши режалаштирилган.
Ташрифнинг ишбилармонлик дастури Милан шаҳрида бўлиб ўтади – Ўзбекистон президенти Ломбардия провинцияси губернаторини қабул қилади ҳамда Италиянинг етакчи компания ва ташкилотлари раҳбарлари билан учрашув ўтказади.
Бир неча кун олдин Шавкат Мирзиёев Туркия президентининг инаугурация маросимида иштирок этган, ундан олдин эса амалий ташриф билан Қирғизистонда бўлганди. Май ўрталарида Ўзбекистон президенти Марказий Осиё—Хитой биринчи саммитида иштирок этиб, минтақавий ҳамкорликни ривожлантириш бўйича муҳим таклиф ва ташаббусларни илгари сурди.
Изоҳ (0)