Шавкат Мирзиёевнинг Италияга ташрифи доирасида ўтказилган бизнес форум давомида “Иссиқлик электр станциялари” ва Италиянинг SACE кредит агентлиги ўртасида учта йирик шартнома ва битта меморандум имзоланди. Бу ҳақда “Иссиқлик электр станциялари” матбуот хизмати хабар қилди.
Уларга кўра, жами 2 миллиард 263,3 миллион еврога тенг тўртта йирик лойиҳа, шу жумладан, Тошкент ИЭСни модернизация қилиш, пойтахтнинг 6 та туманида газ поршенли қурилма ва сув иситиш қозонларини қуриш лойиҳаси, Юнусобод туманидаги 4-Иссиқлик маркази ҳудудида ҳар бирининг қуввати 4,3 мегаваттга тенг 24 та газпоршенли қурилма ва ҳар бирининг қуввати 130 мегаваттга тенг бўлган 4 та сув иситиш қозонларини бунёд этиш ишлари амалга оширилади.
Меморандумга асосан эса 1-, 3-, 5-, 6-, 7-, 8-, 9-, 10-иссиқлик марказларида когенерацион қурилмалар барпо этиш орқали пойтахт аҳолисини қўшимча иссиқлик ва электр энергияси билан таъминлаш имкони яратилади. Мазкур лойиҳа ҳам EPC+F, яъни қуриш ва тўлиқ ишга тушириш даражасида молиялаштириш шартига асосланган. Лойиҳаларнинг ҳар бири истеъмолчиларига барқарор, сифатли электр ва иссиқлик энергияси етказиб беришга қаратилган.
“Биргина Тошкент ИЭСни модернизация қилишга оид келишувга кўра, станциянинг мавжуд қувватини 990 МВтга ошириш кутиляпти. Бунда табиий газни замонавий буғ-газ қурилмалари ҳисобига комбинациялашган циклда самарали ёқишни ташкил этиш, электр ва иссиқлик энергиясини ишлаб чиқариш жараёнига босқичма-босқич замонавий ва юқори самарадор технологияларни жорий этиш орқали кўрсаткичларни ошириш, Тошкент вилояти саноат корхоналари ва уй-жой коммунал хўжаликларини ишончли электр энергияси билан таъминлаш белгиланган. Умумий қиймати 544,5 миллион еврони ташкил этадиган лойиҳа асосида ҳудуднинг ижтимоий соҳаларини янада ривожлантириш ва янги иш ўринларини яратиш режалаштирилган”, — дейилади хабарда.
Маълум қилинишича, юқорида келтирилган тўртта лойиҳа ҳам Вазирлар Маҳкамасининг 2023 йил 13 январдаги 13-сон “Тошкент шаҳри марказлашган иссиқлик таъминоти корхоналари фаолиятини такомиллаштириш тўғрисида”ги қарори ижросига қаратилган.
Президент Шавкат Мирзиёев расмий ташриф билан Италияда бўлиб турибди. Шу куни Рим шаҳридаги расмий тадбирлар дастурига мувофиқ, Шавкат Мирзиёев Кижи саройида Италия Вазирлар кенгаши раиси Жоржа Мелони билан музокара ўтказди.
Етакчилар ҳузурида кўп қиррали ҳамкорликни кенгайтиришга қаратилган 10 та ҳукумат ва идоралараро ҳужжатларни алмашиш маросими ҳам бўлди. Инвестицияларни ўзаро рағбатлантириш ва ҳимоя қилиш тўғрисидаги битим, ҳуқуқий масалаларда, саноат мулки ва қишлоқ хўжалиги соҳаларида ҳамкорлик қилиш тўғрисидаги битимлар шулар жумласидан.
Изоҳ (0)