Сенатнинг Оролбўйи минтақасини ривожлантириш масалалари ва экология қўмитаси мажлисида 31 май куни “Яшил макон” умуммиллий лойиҳаси доирасида Экология, атроф-муҳитни муҳофаза қилиш ва иқлим ўзгариши вазирининг ахбороти тингланди.
Бунда ҳудудларни кўкаламзорлаштириш, дарахтлар экиш ва парвариш қилиш, “яшил боғ”лар ва “яшил белбоғ”ларни барпо этиш борасида амалга оширилган ишлар тўғрисида ҳисобот берилди. Бу ҳақда Сенат матбуот хизмати хабар берди.
Лойиҳа доирасида 2024 йилнинг баҳор мавсумида қатор ишлар амалга оширилган.
Жумладан, Вазирлар Маҳкамасининг 2024 йил 7 мартдаги фармойишига асосан 2024 йилда жами 200 млн, шундан баҳор мавсумида 125 млн туп кўчат экилиши белгиланган бўлиб, баҳор мавсумида 138,1 млн туп (110,5 фоиз) дарахт кўчатлари экилган.
Кўчатларни агротехник талабларга мос равишда экиш, уларни парваришлаш, суғориш, касаллик ва зараркунандаларга қарши курашиш тадбирларини тўғри ташкил этишга қаратилган жойларда 914 та амалий семинарлар ўтказилган.
Кўчатларни суғориш учун 253 та сув чиқариш қудуқлари ва 2906 км узунликда суғориш тизимлари ўрнатилган. Суғориш манбаси мавжуд бўлмаган ҳудудларга суғориш учун 991 та махсус техникалар бириктирилган.
2024 йилнинг ўтган даврида 377 гектар майдонда кўчатхоналар ташкил этилиб, уларда 120 млн ниҳол ва кўчатлар етиштирилган. Ҳудудларда 747 та кўчат савдо ярмаркаси фаолияти йўлга қўйилган.
Қўмита эшитувида амалга оширилган ишлар билан бирга қатор камчиликларга ҳам йўл қўйилганлиги қайд этилди.
Дастлабки маълумотларга кўра, баҳор мавсумида қарийб 600 мингдан ортиқ кўчат суғориш тизими мавжуд бўлмаган жойларга экилишига йўл қўйилган.
Айрим вазирлик, идора ва тармоқларда бу тадбирларга етарлича эътибор қаратмаган. Экилган кўчатларни парвариш қилиш, суғориш, пайҳон қилинишини олдини олиш ишлари етарли даражада амалга оширилмаган.
Президент фармонига мувофиқ ҳудудларда экилган дарахтларнинг касаллик ва зараркунандаларга қарши механик, биологик, кимёвий кураш тадбирларини молиялаштириш маҳаллий бюджет маблағлари ҳамда вазирлик ва идораларнинг бюджетдан ташқари маблағлари ҳисобидан амалга оширилиши белгиланган бўлса-да, ушбу масала ҳал этилмасдан қолмоқда.
Ҳокимликлар, вазирликлар, идора ва ташкилотлар томонидан аввалги мавсумларда экилган, табиий ва бошқа омиллар ҳисобига қуриб қолган дарахтларни хатловдан ўтказиш, кўкармасдан қуриб қолганлари ўрнига янги кўчатларни экиб ўрнини тўлдириш амалиёти йўлга қўйилмаган.
Муҳокама якунида қўмитанинг тегишли қарори қабул қилинди ҳамда камчиликларни бартараф этиш юзасидан масъулларга қатор таклиф ва тавсиялар берилди.
Изоҳ (0)