Тошкентда 2024 йилнинг ўтган даври давомида дарахтларнинг ноқонуний кесилиши билан боғлиқ 87 та ҳолат аниқланиб, табиатга жами 817,3 миллион сўм зарар етказилган.
Олий Мажлис Сенатининг 54-ялпи мажлисида парламент назорати доирасида Тошкент шаҳрида тадбиркорликни ривожлантириш ва экологик вазиятни яхшилаш юзасидан амалга оширилган ишлар ҳолати кўриб чиқилганди.
Маълум бўлишича, экологик вазиятни яхшилаш юзасидан “Яшил макон” умуммиллий лойиҳасининг баҳорги кўчат экиш мавсуми доирасида Тошкент шаҳрида 700 минг донага яқин манзарали, мевали дарахт ва бута кўчатлари ва қаламчалари экилган. Шунингдек, “Яшил макон” умуммиллий лойиҳаси доирасида 12 та туман ҳокимликлари томонидан 20,47 гектар майдонда 26 та ҳокимлик яшил боғлари, ҳар бир туманда “Каштан кўчаси”, “Чинор кўчаси”, “Эман кўчаси”, “Лола дарахти кўчаси” каби намунавий кўчалар ташкил этилган.
Чиқиндиларни бошқариш бўйича Тошкент шаҳрида мавжуд 585 та МФЙ тўлиқ санитар хизмат кўрсатиш бўйича қамраб олинган. Шаҳарда аҳолидан умумий ҳисобда март ойигача 363,2 минг куб метр қаттиқ маиший чиқиндилар олиб чиқиб кетилган.
2024 йилнинг ўтган даврида шаҳарда янги қурилаётган ҳамда фаолият олиб бораётган саноат ва бошқа ишлаб чиқариш корхоналарига жами 1 057 та давлат экологик экспертиза хулосалари тақдим қилинган.
Сенаторлар томонидан шаҳарда экологик вазиятни яхшилашда йўл қўйилган камчиликлар масъул вазирлик ва идораларга кўрсатиб ўтилди ҳамда экология соҳасида мавжуд талаблар бажарилишини таъминлашга қаратилган зарур чоралар кўриш юзасидан таклифлар билдирилди.
Изоҳ (0)