Сўнгги йилларда кино дунёсида смартфонлар ёрдамида суратга олинган фильмлар сони ортиб бормоқда. Режиссёрлар бу технологиядан нафақат харажатларни камайтириш учун, балки ижодий имкониятларни кенгайтириш мақсадида ҳам фойдаланмоқда. Қуйида айнан телефонда суратга олинган тўрт киноасар ҳақида сўз юритамиз.
“28 йил ўтиб”
“28 йил ўтиб” зомби-апокалипсис ҳақидаги машҳур ҳикоянинг давоми бўлиб, Дэнни Бойл ва Алекс Гарланд томонидан суратга олинган.
Фильм фақат узоқ кутилгани билан эмас, балки тўлиқ телефонда суратга олингани билан ажралиб туради. Бутун фильм iPhone 15 Pro ёрдамида махсус линзалар билан тасвирга олинган. Катта саҳналар учун эса 20 та қурилма бир вақтда синхрон қўлланган. Смартфонларнинг ихчамлиги туфайли одатий кинокамералар ололмайдиган ажойиб ракурслар тасвирга туширилган.
“Мандарин”
“Оскар” мукофоти ғолиби “Анора” фильми билан танилган режиссёр Шон Бейкер тажриба қилишдан чўчимайдиган ижодкордир. Айнан унинг ёндашуви кўпларга илҳом манбайи бўлди.
“Мандарин” фильми учун Бейкер уч дона iPhone 5S билан кифояланган. У махсус кенг бурчакли линзалар ва FiLMIC Pro иловасидан фойдаланган.
Қизиғи шунда эдики, фильм илк бор “Санденс” фестивалида намойиш этилганида, ҳеч ким у телефонда суратга олинганини сезмаган. Томошабинлар ва танқидчилар ҳайратда қолган. Кейинчалик бу ҳақиқат ошкор бўлгач, “Мандарин” фильми ҳитга айланган.
“Телба”
Яна бир тажрибаларни севувчи режиссёр Стивен Содерберг 2018 йилда 4K форматда iPhone 7 билан суратга олинган психологик триллер — “Телба” (Unsane)ни тақдим этди.
Фильм сюжетига кўра, бош қаҳрамон Соер Валентини таъқиб қилаётган одамдан яширинмоқчи бўлиб, адашиб руҳий касалхонага ётқизилади. У ерда унга ўхшаган бошқа беморлар суғурта фирибгарлиги учун ушлаб турилаётганини англайди. Бироқ энг қўрқинчлиси — у ўзини таъқиб қилган одамнинг шифокор эканини кўриб қолади. Сўнг у бошқа бир бемор билан қочишга уринади, аммо Соернинг ўзи ҳам ўзининг руҳий ҳолатидан шубҳалана бошлайди.
Фильм атиги 10 кун ичида суратга олинган. Бош ролларда “Тахт” сериалидан таниқли Клер Фой ва Жошуа Леонард иштирок этган.
“Шакар одамни излаб”
Бу фильм 1970 йилларда яшаб ўтган фолк ва рок хонанда Сиксто Родригес ҳақида. АҚШда тан олинмаган бўлса-да, у Жанубий Африкада машҳур шахсга айланган. Бироқ ўша давр сиёсати ва интернетнинг йўқлиги сабабли хонанда ҳақида деярли ҳеч ким ҳеч нима билмаган. Ҳаттоки у саҳнада ўзини ёқиб юборган, деган миш-мишлар тарқалган.
Режиссёр Малик Бенжеллоул дастлаб 8 мм ли классик киноплёнкани танлаган, бироқ бюджет етмай қолган. Материал тугагач, у iPhone’га 8mm Vintage Camera иловасини ўрнатиб, фильмга ўхшаш эффектлар яратишга эришган. Натижада бу картина киносеварлар ва мусиқа ихлосмандлари орасида ҳақиқий феноменга айланган. 2013 йилда эса энг яхши ҳужжатли фильм йўналишида “Оскар” мукофотини қўлга киритган.
Изоҳ (0)