Disney ва NBCUniversal компаниялари Midjourney сунъий интеллект ишлаб чиқарувчисини муаллифлик ҳуқуқини бузганликда айблаб, унга қарши суд жараёнини бошлади. Бу ҳақда Axios хабар бермоқда.
АҚШнинг Марказий Калифорния округ судига топширилган шикоятда Midjourney компаниясига интеллектуал мулк ҳуқуқларини тўғридан тўғри ва билвосита бузганлик бўйича даъво киритилди. Компания ўзининг тил моделини ўқитиш учун студиялар муаллифлигидан фойдалангани ва уларнинг қаҳрамонларига ўхшаш тасвирлар яратгани таъкидланди.
Далил сифатида Midjourney воситаси “Қирол шер” ва “Алоуддин” мультфильмларидаги Дисней қаҳрамонлари каби персонажларга ўхшаш тасвирларни қандай яратишини кўрсатадиган ўнлаб визуал мисоллар келтирилган.
NBCUniversal ижрочи вице-президенти ва бош юристи Ким Ҳаррис компаниянинг рақамли қароқчиликка нисбатан нуқтайи назарини билдирди: “Қандай технология ишлатилишидан қатъи назар, ўғрилик ўғриликлигича қолади ва бу ҳаракат бизнинг муаллифлик ҳуқуқларимизни очиқдан очиқ бузиш ҳисобланади”.
Айтганча, яқинда Эминемнинг Eight Мile Style нашриёт компанияси Facebook, Instagram ва WhatsApp эгалик қиладиган Меtа Platformsʼга қарши судга мурожаат қилиб, уни муаллифлик ҳуқуқларини бузганликда айблади ва 109 миллион доллардан ортиқ зарар қопланишини талаб қилди.
Изоҳ (0)