Шавкат Мирзиёев тадбиркорликни ҳар томонлама қўллаб-қувватлаш бўйича 2024 йил якунлари ва 2025 йилга асосий режалар юзасидан видеоселектор йиғилиши ўтказди.
“Дарё” йиғилишда эълон қилинган муҳим маълумотлар ва билдирилган фикрларни жамлади.
Президент тадбиркорликни ривожлантириш стратегик вазифа эканини алоҳида таъкидлаб, энг катта кучимиз шу соҳада мужассам эканини айтиб ўтди.
Шунингдек, Ўзбекистонда 2024 йилнинг ўзида тадбиркорлар фаолияти учун муҳим аҳамиятга эга 5 та қонун, 101 та фармон ва қарорлар қабул қилингани маълум қилинди.
Шавкат Мирзиёев мураккаб геосиёсий шароитга қарамай, Ўзбекистон иқтисодиёти 6,3 фоизга ошиб, 111 млрд доллардан кўпайганини алоҳида қайд этди.
Шунингдек, мамлакатда камбағаллик даражаси йил якуни билан 9 фоиздан пасайгани ҳам таъкидланди.
“Аминманки, ўзаро ишончга асосланган ҳамкорлигимизни шу суръатда давом эттирсак, келгуси йилларда камбағаллик даражасини бемалол 6 фоизга туширамиз”, деди президент.
Шунингдек, 5 мингдан ортиқ ишчиси бор, йиллик даромади 1 трлн сўмдан ошган, камида 100 млрд сўм солиқ тўлаётган 142 нафар “чемпион” тадбиркорлар пайдо бўлгани алоҳида эътироф этилди.
Йиғилишда 2025 йилда Ўзбекистонда амалга оширилиши режалаштирилган чора-тадбирлар ҳақида ҳам сўз борди.
Жумладан:
- илк бор электр энергиясининг онлайн улгуржи бозори ишга тушади;
- 4,5 мингта бино ва 6 минг гектар ер тадбиркорларга таклиф қилинади;
- бизнес учун йўл, сув, электр, газ, темирйўл каби инфратузилма объектларини яхшилашга 43 трлн сўм ажратилади;
- давлат монополиясида бўлган йўлларни таъмирлаш ва сақлашга хусусий секторни жалб қилиш ишлари кенгайтирилади;
- банклар четдан давлат кафолатисиз 6 млрд доллар жалб қилиши режалаштирилган.
Шунингдек, IT-Парк резидентларига барча турдаги солиқларни тўлашдан озод этиш бўйича имтиёзлар 2040 йилгача узайтирилиши ҳам маълум қилинди.
Йиғилиш сўнггида Шавкат Мирзиёев Ўзбекистонда тадбиркорлик ҳаракати орқага қайтариб бўлмайдиган катта кучга айланганини таъкидлади.
"Биз давлат миқёсида қандай катта мақсад ва вазифаларни ўз олдимизга қўймайлик, уларни амалга оширишда бутун халқимиз билан бирга аввало сизларга таянамиз. Сизларни Янги Ўзбекистонни барпо этиш йўлида ҳал қилувчи куч, деб биламиз. Тадбиркорларимиз қанча бой бўлса, халқимиз шунча фаровон яшайди, давлатимиз шунча қудратли бўлади. Тадбиркорнинг ютуғи – бу бутун халқимизнинг ютуғи”, деди президент.
Изоҳ (0)