Shavkat Mirziyoyev tadbirkorlikni har tomonlama qo‘llab-quvvatlash bo‘yicha 2024-yil yakunlari va 2025-yilga asosiy rejalar yuzasidan videoselektor yig‘ilishi o‘tkazdi.
“Daryo” yig‘ilishda e’lon qilingan muhim ma’lumotlar va bildirilgan fikrlarni jamladi.
Prezident tadbirkorlikni rivojlantirish strategik vazifa ekanini alohida ta’kidlab, eng katta kuchimiz shu sohada mujassam ekanini aytib o‘tdi.
Shuningdek, O‘zbekistonda 2024-yilning o‘zida tadbirkorlar faoliyati uchun muhim ahamiyatga ega 5 ta qonun, 101 ta farmon va qarorlar qabul qilingani ma’lum qilindi.
Shavkat Mirziyoyev murakkab geosiyosiy sharoitga qaramay, O‘zbekiston iqtisodiyoti 6,3 foizga oshib, 111 mlrd dollardan ko‘payganini alohida qayd etdi.
Shuningdek, mamlakatda kambag‘allik darajasi yil yakuni bilan 9 foizdan pasaygani ham ta’kidlandi.
“Aminmanki, o‘zaro ishonchga asoslangan hamkorligimizni shu sur’atda davom ettirsak, kelgusi yillarda kambag‘allik darajasini bemalol 6 foizga tushiramiz”, dedi prezident.
Shuningdek, 5 mingdan ortiq ishchisi bor, yillik daromadi 1 trln so‘mdan oshgan, kamida 100 mlrd so‘m soliq to‘layotgan 142 nafar “chempion” tadbirkorlar paydo bo‘lgani alohida e’tirof etildi.
Yig‘ilishda 2025-yilda O‘zbekistonda amalga oshirilishi rejalashtirilgan chora-tadbirlar haqida ham so‘z bordi.
Jumladan:
- ilk bor elektr energiyasining onlayn ulgurji bozori ishga tushadi;
- 4,5 mingta bino va 6 ming gektar yer tadbirkorlarga taklif qilinadi;
- biznes uchun yo‘l, suv, elektr, gaz, temiryo‘l kabi infratuzilma obyektlarini yaxshilashga 43 trln so‘m ajratiladi;
- davlat monopoliyasida bo‘lgan yo‘llarni ta’mirlash va saqlashga xususiy sektorni jalb qilish ishlari kengaytiriladi;
- banklar chetdan davlat kafolatisiz 6 mlrd dollar jalb qilishi rejalashtirilgan.
Shuningdek, IT-Park rezidentlariga barcha turdagi soliqlarni to‘lashdan ozod etish bo‘yicha imtiyozlar 2040 yilgacha uzaytirilishi ham ma’lum qilindi.
Yig‘ilish so‘nggida Shavkat Mirziyoyev O‘zbekistonda tadbirkorlik harakati orqaga qaytarib bo‘lmaydigan katta kuchga aylanganini ta’kidladi.
"Biz davlat miqyosida qanday katta maqsad va vazifalarni o‘z oldimizga qo‘ymaylik, ularni amalga oshirishda butun xalqimiz bilan birga avvalo sizlarga tayanamiz. Sizlarni Yangi O‘zbekistonni barpo etish yo‘lida hal qiluvchi kuch, deb bilamiz. Tadbirkorlarimiz qancha boy bo‘lsa, xalqimiz shuncha farovon yashaydi, davlatimiz shuncha qudratli bo‘ladi. Tadbirkorning yutug‘i – bu butun xalqimizning yutug‘i”, dedi prezident.
Izoh (0)