Тошкент шаҳрининг Бектемир туманидан ўтувчи автомобиль йўлининг бир қисмида ҳаракат 3 июлдан 8 июлгача бир томонлама ёпилади. Бу ҳақда Транспорт вазирлиги хабар берди.
Маълум қилинишича, бунга автомобиль йўлининг 0–3-километрлари оралиғида йўлнинг асфалт-бетон қопламасида режага асосан таъмирлаш ишлари олиб борилиши сабаб бўлади.
Тошкентдан Оҳангарон шоссесига чиқиш йўли Д001 Тошкент ҳалқа автомобиль йўлининг 47-километридан (Роҳат айланма йўли) Қўйлиқ йўналишига йўналтирилади.
Юқори Чирчиқ туманидан Тошкентга кириш йўли Д012 Бектемир – Чирчиқ, Ғазалкент – Чорбоғ қўрғони автомобиль йўлининг 6-километридан Йик-ота ва Фарғона йўлига йўналишига йўналтирилади.
Тошкентда 2 июль куни Роҳат айланма йўлидаги таъмирлаш ишлари сабаб йирик тирбандликлар юзага келгани ҳақида хабар берилганди.
Пойтахт ИИББ ЙҲХБ матбуот хизмати 24 июнь куни қурилиш-таъмирлаш ишлари олиб борилиши муносабати билан Яшнобод туманидаги Оҳангарон шоҳ кўчасида транспорт воситалари ҳаракати вақтинча тўхтатилишини маълум қилганди.
Расмий хабарда Темур Малик—Паркент—Махтумқули кўчалари айланма ҳаракатидан, ТҲАЙ—Оҳангарон шоҳкўчалари айланма ҳаракатигача бўлган қисми ёпилиши кўрсатилган. Ишларни бажариш дастлаб 1 июлгача давом этиши қайд этилганди. Кейинчалик унга ўзгартириш киритилиб, 4 июлгача давом этиши белгиланди.
Роҳат айланма йўлида автомобиль ҳаракати вақтинча ёпилиши сабабли, 2 июль куни ушбу ҳудуд орқали ҳаракатланувчи 26, 54, 110, 119, 128, 174-сонли автобус йўналишларининг ҳаракати ўзгартирилди.
Тошкент шаҳар транспорт ва йўл-транспорт инфратузилмасини ривожлантириш бош бошқармаси зарурат туғилганда йўналишларга қўшимча ўзгартиришлар киритилиши мумкинлигини маълум қилди.
Изоҳ (0)